சேலம் : வாழப்பாடி அருகே பேளூர் மெயின் ரோட்டில், 11 அடி நீள ஆண் மலைப்பாம்பு பிடிபட்டது. வாழப்பாடி, பேளூர் ஈஸ்வரன் கோவில் அருகே, நேற்று முன்தினம் இரவு 10 மணிக்கு பெரிய மலைப்பாம்பு ஒன்று, ரோட்டோரத்தில் சுருண்டு கிடந்ததை அந்த வழியே சென்ற சிலர் பார்த்துள்ளனர். அவர்கள், வாழப்பாடி வனத்துறை அலுவலகத்துக்கு தகவல் கொடுத்தனர். வாழப்பாடி வனத்துறையை சேர்ந்தவர்கள், பாம்புகளை பிடிக்கும் குழுவுக்கு தகவல் அளித்தனர்.பாம்பு பிடிப்பதில் தேர்ச்சி பெற்றவர்களான முருகன், சிவா, லாரா, தினேஷ், விஜி ஆகியோர் சம்பவ இடத்துக்கு சென்றனர். சுருண்டு கிடந்த மலைப்பாம்பை, லாவகமாக பிடித்து சேலம் வனத்துறை அலுவலகத்துக்கு நேற்று வந்தனர். தெற்கு வனச்சரகர் பன்னீர்செல்வம் உத்தரவின்பேரில், வனகாப்பாளர் சாமிராஜன், வன காவலர் நாசினி ஆகியோர் மலைப்பாம்பை பார்வையிட்டனர்.