தமிழக அரசு தகுதி அடிப்படையில் மகளிருக்கு மாதம் ரூ.1000 உதவித்தொகை வழங்கும் திட்டத்தை துவக்கியது. இதற்காக மாவட்ட வாரியாக விண்ணப்ப மனு, ஆதார், ரேஷன் கார்டு உள்ளிட்டவற்றில் உள்ள விபரங்களை ஆன்லைனில் பதிவு செய்து, அரசுக்கு அனுப்ப அந்தந்த மாவட்டத்தில் தாலுகா வாரியாக டேட்டா என்ட்ரி ஆப்பரேட்டர்கள் நியமிக்கப்பட்டனர். இவர்களுக்கு மாதம் ரூ.8000 சம்பளம் வழங்கப்படும் என தெரிவிக்கப்பட்டது.

2023 அக்டோபர் முதல் 2024 மார்ச் வரை மகளிர் உரிமைத்தொகை மனுக்கள், ஆதார், ரேஷன் கார்டுகளை 'ஸ்கேனிங்' செய்து இணையதளம் மூலம் அரசுக்கு அனுப்பும் பணியில் ஈடுபட்டனர்.

ஒவ்வொரு தாலுகாவிலும் 25 முதல் 60 ஆயிரம் விண்ணப்பங்கள் வரை அரசுக்கு அனுப்பியுள்ளனர். 'டேட்டா என்ட்ரி ஆப்பரேட்டர்கள்' மகளிர் திட்டம் மூலம் நியமிக்கப்பட்டனர்.

தொடர்ந்து 5 மாதங்களாக இப்பணியை முடித்து கொடுத்தவர்களுக்கு, மாதம் ரூ.8000 சம்பளம் வீதம் தலா ஒரு நபருக்கு ரூ.40 ஆயிரம் சம்பள பணத்தை மாவட்ட நிர்வாகம் இது வரை வழங்கவில்லை என கலெக்டர் அலுவலக புகார் பெட்டியில் பாதிக்கப்பட்ட 'டேட்டா என்ட்ரி ஆப்பரேட்டர்கள்' புகார் அளித்துள்ளனர்.

மாவட்ட மகளிர் திட்ட இயக்குனர் கவிதப்பிரியா கூறியதாவது: ஏற்கனவே 'ஸ்கேனிங்' பணியில் ஈடுபட்ட பெண்களுக்கு சம்பளம் வழங்கி விட்டோம். 'டேட்டா என்ட்ரி ஆப்பரேட்டர்களுக்கு' சம்பளம் கிடைக்காதது குறித்து விசாரிக்கப்படும்.