சிவகங்கை மாவட்டத்தில் வன உயிரினங்களில் முதன்மையாக உள்ளது புள்ளிமான்கள். 25 ஆண்டுகளுக்கு முன் ஏராளமான மான்கள் இருந்தன. தற்போது வேட்டையாடுதல் முற்றிலுமாக ஒழிக்கப்பட்டதாலும், மக்களிடையே விழிப்புணர்வு ஏற்பட்டதாலும் புள்ளிமான்கள் எண்ணிக்கை பல ஆயிரத்தை தாண்டியுள்ளது.

மாவட்டத்தில் பரவலாக குறுங்காடுகளே உள்ளன. மான்கள் எண்ணிக்கை மேலும் அதிகரிப்பதற்கேற்ப காடுகளின் பரப்பு அதிகரிக்கவில்லை

தற்போது மாவட்டத்தின் மொத்த நிலப்பரப்பான 4.18 லட்சம் எக்டேரில் வனப்பரப்பு 16.5 ஆயிரம் எக்டேர் மட்டுமே. அதில் காப்புக்காடுகளில் நல்ல நீர்வளம் உள்ள 35 ஆயிரம் ஏக்கரில் இயற்கையான காடுகளே இல்லை. அந்த வனப்பரப்பு தமிழ்நாடு வனக்கழகத்திற்கு குத்தகை விடப்பட்டுள்ளது.

அதில் யூகலிப்ட்ஸ், முந்திரி மரங்கள் வளர்க்கப்பட்டு, சில ஆண்டுகளில் வெட்டப்பட்டு, மீண்டும்நடப்படுகிறது. இதனால் தொடர்ந்து தொழிலாளர்கள் நடமாட்டம் அப்பகுதியில் நிலவுவதும், இயற்கையாக வளரும்செடிகள் அகற்றப்படுவதும் தொடர்கிறது.

அப்பகுதியில் புற்கள், குறுஞ்செடிகள் வளர்வதற்கான வாய்ப்பு இல்லாமல் போய் விட்டது. மேலும் மழைநீர் புரண்டோடும் சிறு ஓடைகளும் அழிந்து நிலத்தடி நீர் வளமும் பாதிக்கப்பட்டுள்ளது.

இந்த பகுதியில் இந்த மரங்கள் நடவிற்கு முன்பாக வசித்த நரி, தேவாங்கு, மரநாய், ஓநாய், காட்டுப்பூனை உள்ளிட்டவை அழிந்து விட்டன. தற்போது அதில் அரிதாக மான்கள் மட்டும் பெருகி வருகின்றன. அதற்கேற்ப அதன் வாழிடம் இல்லை.

இதனால் நீர் மற்றும் தீவனப்பற்றாக்குறையால் வேறு இடங்களுக்கு செல்லும் போது குடியிருப்பு, தனியார் தோட்டங்களில் நாய்களால் கடிக்கப்பட்டு உயிரிழந்து வருகின்றன. வேலிகளில் சிக்கியும் காயமடைகின்றன.

வன உயிரினங்கள் பாதுகாப்பாக வாழ நிரந்தர நடவடிக்கையாக காப்புக்காடுகள் அதிகரிக்கப்பட வேண்டும். மான்களைக் காப்பாற்ற காப்புக்காடுகளை மான்கள் உள்ளிட்ட வன உயிரினங்களின் வாழிடமாக்க அரசு நடவடிக்கை எடுக்க வேண்டும். தற்போது காப்புக்காடுகளில் வனத் தோட்ட கழகத்தின் குத்தகையை ரத்து செய்து இயற்கையான தாவரங்கள் வளரும் இடமாக மாற்ற வேண்டும்.

இல்லாவிட்டால் சிவகங்கை மாவட்டத்தின் வன உயிரினங்கள் பாதிக்கப்படுவதுடன், வனப்பரப்பு வெறும் வரைபடத்தில் மட்டும் இருக்கும். மாவட்டத்தின் இயற்கை சமச்சீர் முற்றிலுமாக பாதிக்கப்படும் என்ற வன உயிரின ஆர்வலர்கள் தெரிவித்துள்ளனர்.