63 நாயன்மார்களுள் ஒருவரான இளையான்குடி மாற நாயனார் குருபூஜை விழா சிவகங்கை சமஸ்தானம் தேவஸ்தான நிர்வாகத்துக்குட்பட்ட ராஜேந்திர சோழீஸ்வரர், ஞானாம்பிகை கோயிலில் நேற்று காலை துவங்கியது. காலை 9:00 மணிக்கு ஹோமங்கள் வளர்க்கப்பட்டு பூஜை நடைபெற்று மூலவர் ராஜேந்திர சோழீஸ்வரர், ஞானாம்பிகை அம்பாள், மாறநாயனார், புனிதவதி அம்பாள், உற்சவமூர்த்திகளுக்கு திருமஞ்சனம் செய்யப்பட்டு அபிஷேக, ஆராதனை, தீபாராதனை நடைபெற்றது.

மாலை 6:00 மணிக்கு திரு ஆனைக்கா சிவ.ராகவனின் ஆன்மிக சொற்பொழிவும், இரவு 8:30 மணிக்கு மாறநாயனார் புராணம் வாசித்து நாயனாருக்கு சிவபெருமான் அருளிய ஜோதிக்காட்சி காண்பித்து இரவு 10:00 மணிக்கு கைலாய வாத்தியங்கள் முழங்க உற்ஸவமூர்த்திகள் திருவீதி உலா நடைபெற்றது.

விழாவில் இளையான்குடி பரமக்குடி சுற்றுவட்டார பகுதிகளை சேர்ந்த பக்தர்களும், சிவனடியார்களும் கலந்து கொண்டனர். ஏற்பாடுகளை இளையான்குடி மாறநாயனார் அடியார் திருக்கூட்டத்தினர் செய்திருந்தனர்.