காரைக்குடி ராஜிவ் காந்தி சிலை அருகே கல்லுாரி சாலையில் 800 மீட்டர் துாரத்திற்கு நெடுஞ்சாலை துறை சார்பில் ரோடு அமைக்கும் பணி நடந்து வருகிறது. கடந்த 2021 - 22ம் ஆண்டு பாதாள சாக்கடை திட்ட பணி நடந்ததால் ரோடு போடப்பட்ட நிலையில் தற்போது மீண்டும் புதிதாக ரோடு அமைப்பதாக புகார் எழுந்துள்ளது.

சமூக ஆர்வலர் ச. திருஞானம் கூறுகையில்: கடந்த 2019ம் ஆண்டு நெடுஞ்சாலைத்துறை சார்பில் கல்லுாரி சாலையில் ரோடு அமைக்க ரூ. 87 லட்சம் ரூபாய் நிதி ஒதுக்கீடு செய்யப்பட்டது.

இந்நிலையில் 2021--22 ஆம் ஆண்டு பாதாளச் சாக்கடை திட்டத்தில் கல்லுாரி சாலையில் ரோடு பணி நடந்தது. நகராட்சி நிர்வாகம் நிதி வழங்கி நெடுஞ்சாலை துறை சார்பில் ரோடு போடப்பட்டது.

2 வருடமே ஆன நிலையில் தற்போது மீண்டும் ரோடு புதுப்பிக்கும் பணி நடக்கிறது. நன்றாக இருக்கும் சாலை மீது மீண்டும் ரோடு போடுவதால் மக்களின் வரிப்பணம் வீணாகிறது.

நெடுஞ்சாலைத்துறை உதவி கோட்ட பொறியாளர் அரிமுதன் கூறுகையில்:

நெடுஞ்சாலைத்துறை சார்பில் 5 ஆண்டுகளான சாலைகள் பி.பி.எம்.சி., திட்டத்தின் கீழ் மீண்டும் சாலைப் பணி நடக்கிறது. 5 ஆண்டு நிறைவடையாமல் சாலை பணி நடைபெறாது. கொப்புடைய அம்மன் கோயில் பின்புறம் செல்லும் ஒரு வழிச்சாலை நகராட்சிக்கு சொந்தமானது. நெடுஞ்சாலைத்துறைக்கு சொந்தமானது அல்ல என்றார்.