இளையான்குடி பேரூராட்சி கூட்டம் தலைவர் நஜூமுதீன் தலைமையில் நடந்தது. துணைத்தலைவர் இப்ராஹிம் முன்னிலை வகித்தார்.செயல் அலுவலர் கோபிநாத் வரவேற்றார்.தலைமை அலுவலர் முருகன் தீர்மானங்களை வாசித்தார்.

கூட்டத்தில் நடந்த விவாதங்கள்:

செய்யது ஜமீமா தி.மு.க., கவுன்சிலர்: இளையான்குடி பழைய பேரூராட்சி கட்டடத்தை இடித்துவிட்டு நுாலகம் மற்றும் வணிக வளாகம் கட்டப்படுவது போன்று இளையான்குடி அரசு மருத்துவமனையையும் விரிவாக்கம் செய்ய நடவடிக்கை எடுக்க வேண்டும்.

செயல் அலுவலர் கோபிநாத்: அரசு மருத்துவமனை வளாகம் பொதுப்பணித்துறை கட்டுப்பாட்டில் உள்ளது ஆகவே இது குறித்து மாவட்ட கலெக்டர் தான் முடிவெடுக்க முடியும்.

ஜலாலுதீன் ம.ம.க., கவுன்சிலர்: இளையான்குடி பேரூராட்சிக்குட்பட்ட பகுதிகளில் எங்கு பார்த்தாலும் கழிவுநீர் தேங்கி நிற்பதால் சுகாதாரக் கேடு ஏற்பட்டு வருகிறது.

செயல் அலுவலர் கோபிநாத்: பேரூராட்சிக்குட்பட்ட பகுதிகளில் கழிவுநீர் சுத்திகரிப்பு நிலையங்கள் அமைக்க போதுமான இட வசதி இல்லாததால் தற்போது ஒரு இடத்தில் மட்டும் சுத்திகரிப்பு நிலையம் அமைக்க நடவடிக்கை எடுக்கப்பட்டு வருகிறது.

நாகூர் மீரா அ.தி.மு.க., கவுன்சிலர்: குப்பைகளை அள்ள தேவையான டிராக்டர்களை வாங்க வேண்டும் காவிரி குடிநீரில் அதிகளவு குளோரின் பவுடர் கலப்பதால் தண்ணீரை குடிக்க முடியாமல் மக்கள் அவதிப்பட்டு வருகின்றனர்.

செயல் அலுவலர் கோபிநாத்: டிராக்டர்கள் வாங்குவதற்கு நடவடிக்கை எடுக்கப்பட்டு வருகிறது காவிரி குடிநீரில் இயந்திரங்களின் துணையோடு தேவையான அளவு குளோரின் மட்டுமே கலக்கப்பட்டு வருகிறது.

இஸ்ரின் பேகம்: தி.மு.க., கவுன்சிலர்: எனது வார்டுக்குட்பட்ட பகுதிகளில் தெருவிளக்குகள் அமைக்காமல் இருப்பதினால் இரவு நேரங்களில் பொதுமக்கள் மிகுந்த சிரமத்திற்குள்ளாகி வருகின்றனர்.

செயல் அலுவலர் கோபிநாத்: இளையான்குடியில் ரூபாய் 48 லட்சம் செலவில் 950 எல் இ டி விளக்குகள் பொருத்துவதற்கான நடவடிக்கைகள் எடுக்கப்பட்டு வருகின்றன.

கூட்டத்தில் பேரூராட்சி கவுன்சிலர்கள், ஊழியர்கள் கலந்து கொண்டனர்.