மானாமதுரை நகராட்சி கூட்டம் தலைவர் மாரியப்பன் கென்னடி தலைமையில் நடந்தது. துணைத் தலைவர் பாலசுந்தரம், கமிஷனர் ரங்கநாயகி, பொறியாளர் சீமா முன்னிலை வகித்தனர்.மேலாளர் பாலகிருஷ்ணன் வரவேற்றார்.

கூட்டத்தில் நடந்த விவாதங்கள்:

காளீஸ்வரி தி.மு.க., கவுன்சிலர்: வசந்த நகர் பகுதியில் குடிநீர் தொட்டி அமைக்க வேண்டுமென 2 வருடங்களாக கோரிக்கை விடுத்தும் இதுவரை எவ்வித நடவடிக்கையும் எடுக்கவில்லை.

வெள்ளாளர் தெருவில் தினந்தோறும் குப்பை அள்ளுவது கிடையாது. நகராட்சி அதிகாரிகள் ஆய்வுக்கு வரும்போது கவுன்சிலர்களுக்கு தெரியப்படுத்துவது கிடையாது.

கமிஷனர் ரெங்கநாயகி: பல்வேறு அலுவலக பணிகளுக்கிடையே ஆய்வுக்கு சென்று வருகிறோம். வார்டுகளில் உள்ள குறைகள் குறித்து கடிதம் மூலமாக நகராட்சி அலுவலகத்தில் கவுன்சிலர்கள் வழங்க வேண்டும்.

நகராட்சி துணைத் தலைவர் பாலசுந்தரம்: சிறிய சிறிய குறைகளுக்கெல்லாம் அதிகாரிகளை பார்த்து கடிதம் கொடுக்கும் சூழ்நிலையில் கவுன்சிலர்கள் கொடுக்க முடியாமல் தான் குறைகளை அதிகாரிகளிடம் கூறி வருகின்றனர். ஆகவே அதிகாரிகள் அதற்கு தகுந்த நடவடிக்கை எடுக்க வேண்டும்.

இந்திரா அ.தி.மு.க., கவுன்சிலர்: காந்திஜி நகரில் உள்ள மின் கம்பங்கள் மிகவும் சேதமடைந்து கீழே விழும் நிலை உள்ளது. ஆகவே இதனை மாற்ற மின்வாரியத்திடம் தெரிவித்தும் இதுவரை எவ்வித நடவடிக்கையும் எடுக்கவில்லை.

தலைவர் மாரியப்பன் கென்னடி: மின்வாரியத்தின் மூலம் உடனடியாக நடவடிக்கை எடுக்கப்படும்.

தேன்மொழி தி.மு.க., கவுன்சிலர்: 1வது வார்டுக்குட்பட்ட பகுதிகளில் உள்ள கண்மாய்களிலிருந்து தண்ணீர் வெளியேறி குடியிருப்பு பகுதிக்கு வரும் காலங்களில் நடவடிக்கை எடுப்பது கிடையாது.

தலைவர் மாரியப்பன் கென்னடி: கண்மாய் பொதுப்பணித்துறை மற்றும் ஊராட்சி ஒன்றிய கட்டுப்பாட்டில் உள்ளதால் நடவடிக்கை எடுப்பதில் சிக்கல் ஏற்பட்டுள்ளது. மாவட்ட கலெக்டர் மூலம் விரைவில் நடவடிக்கை எடுக்கப்படும்.

சோம சதீஷ்குமார் தி.மு.க., கவுன்சிலர்: மானாமதுரை அரசகுழி மயானத்தில் அமைக்கப்பட்டுள்ள மின் மயானத்தை உடனடியாக துவங்க வேண்டும்.ஆதனுார் சாலையில் உள்ள மயானத்தை பராமரிக்க நடவடிக்கை எடுக்க வேண்டும்.

தலைவர் மாரியப்பன் கென்னடி: உடனடியாக நடவடிக்கை எடுக்கப்படும்.

செல்வகுமார் தி.மு.க., கவுன்சிலர்: அந்தந்த வார்டுகளுக்குரிய சுகாதார மேஸ்திரிகளை நகராட்சி கவுன்சிலர்களிடம் அறிமுகப்படுத்தி கவுன்சிலர்களை தொடர்பு கொள்ள நடவடிக்கை எடுக்க வேண்டும்.

சுகாதார ஆய்வாளர் பாண்டிச்செல்வம்: விரைவில் நடவடிக்கை எடுக்கப்படும்.

கூட்டத்தில் நகராட்சி கவுன்சிலர்கள், பணியாளர்கள் கலந்து கொண்டனர்.