திருப்புத்துார் ஊராட்சி ஒன்றியத்தின் புதிய அலுவலகத்தில் முதல் கூட்டம் நடந்தது. தலைவர் சோ.சண்முகவடிவேல் தலைமை வகித்தார். பி.டி.ஓ.,சத்யன், துணைத் தலைவர் மீனாள் முன்னிலை வகித்தனர். ஏ.பி.டி.ஓ.,சேதுராமன் வரவேற்றார். ஏ.பி.டி.ஓ.,மாணிக்கவாசகம் தீர்மானங்களை வாசித்தார்.தொடர்ந்து கவுன்சிலர்கள் கோரிக்கை குறித்து பேசினர்.

தலைவர்: புதிய அலுவலகக் கட்டடம் கட்ட ரூ 4.72 கோடி அனுமதி அளித்த முதல்வர், அமைச்சர் பெரியகருப்பன் ஆகியோருக்கு நன்றி. மீதமுள்ள மூன்று மாதங்களில் நிறைவேற்ற வேண்டிய பணிகள் குறித்து கவுன்சிலர்கள் பேசலாம்.

ராமசாமி (தி.மு.க.,): கடந்த 5 ஆண்டுகளில் ஓரளவு பணிகளை நிறைவேற்றியுள்ளோம். அடுத்த குறுகிய காலத்தில் வேகமாக பணிகள் நிறைவேற ஒத்துழைக்க வேண்டும். ஐந்து ஆண்டுகளாக வலியுறுத்தியும் வனப்பகுதியில் செல்லும் வேலங்குடி-மகிபாலன்பட்டி, வேலங்குடி-கொன்னத்தான்பட்டி உள்ளிட்ட ரோடுகள் இன்றளவும் நிறைவேற்றப்படவில்லை. அதற்கு விரைவாக அனுமதி அளிக்க வேண்டும்.

பழனியப்பன் (அ.தி.மு.க.,): வடக்கூர்-, திருக்களம்பூர் ரோட்டில் புதுக்கோட்டை பகுதியில் ரோடு போடப்பட்டுள்ளது. நமது மாவட்ட பகுதியில் வனத்துறை அனுமதிக்காததால் போடவில்லை. தெக்கூர் அய்யனார் கோயில் ரோடு, குலாலர் தெரு ரோடுகள் போட வேண்டும்.

சகாதேவன் (தி.மு.க.,): வார்டு வாரியாக நலத்திட்டங்கள் நிறைவேற்ற அமைச்சரிடம் கூடுதலாக நிதி ஒதுக்கீடு பெற வேண்டும்.

தலைவர்: கவுன்சிலர்கள் ரூ 5 லட்சம் பங்களிப்பு செய்தால் வார்டுக்கு ரூ 15 லட்சம் வீதம் நமக்கு நாமே திட்டத்தில் நிறைவேற்றலாம்.

கருப்பையா (தி.மு.க.,): எங்கள் பகுதியில் காலனி வீடுகளுக்கான மனைகளுக்கு பட்டா வழங்க கோரி உங்களை தேடி முதல்வர் முகாமில் மனு கொடுத்தோம். வருவாய்த்துறை நடவடிக்கை எடுக்கவில்லை. பூலான்பட்டி ரோடு ஐந்து ஆண்டுகளாக போடாமல் உள்ளது.

தலைவர்: விரைவில் பட்டா வழங்குவார்கள். மண்ரோடாக உள்ளது. விரைவில் வேலைக்குறுதி திட்டத்தில் ரோடு உருவாக்கப்படும்.

டி.பி.டி.ஓ.,சரவணக்குமார் நன்றி கூறினார். கவுன்சிலர்கள் கலைமாமணி, சுமதி, பாக்யலெட்சுமி, ராமேஸ்வரி துறை அலுவலர்கள், ஒன்றிய அலுவலர்கள், பணியாளர்கள் பங்கேற்றனர்.