மானாமதுரை நகராட்சி கூட்டம் தலைவர் மாரியப்பன் கென்னடி தலைமையில் நடந்தது.துணைத்தலைவர் பாலசுந்தரம், கமிஷனர் ரங்கநாயகி, மேலாளர் பால கிருஷ்ணன், பொறியாளர் முத்துக்குமார் முன்னிலை வகித்தனர்.

கூட்டத்தில் நடந்த விவாதங்கள்:

சதீஷ்குமார், தி.மு.க.,: தற்போது 27 வார்டுகளிலும் குடிநீர் குழாய் புதிதாக அமைக்கும் பணி நடைபெற்று வருகிறது. அனைத்து பகுதிகளுக்கும் சமமாக குடிநீர் வழங்கும் வகையில் இப்பணி நடைபெற வேண்டும்.

மாரிக்கண்ணன், தி.மு.க.,: மானாமதுரை நகராட்சியில் தற்போது 2 அல்லது 3 மாதங்களுக்கு ஒரு முறை கூட்டம் நடைபெறுகிறது. மக்கள் பிரச்னைகளை கூட்டத்தில் தெரிவிக்க காலதாமதமாவதால் மாதந்தோறும் கூட்டம் நடைபெற நடவடிக்கை எடுக்க வேண்டும்.

தலைவர் மாரியப்பன் கென்னடி: அடுத்த மாதம் முதல் மாதம் தோறும் கூட்டம் நடத்த நடவடிக்கை எடுக்கப்படும்.

தெய்வேந்திரன் அ.தி.மு.க., : மெயின் ரோடுகளில் தெரு விளக்குகள் முறையாக அமைக்க வேண்டும்.

பொறியாளர் முத்துக்குமார்: தெருவிளக்குகள் அனைத்து பகுதிகளிலும் புதிதாக அமைக்கப்பட்டு வருகின்றன. விரைவில் நகராட்சி பகுதி முழுவதும் தெருவிளக்கு அமைக்கப்படும்.

பாலாஜி, தி.மு.க., : மானாமதுரை நகராட்சிக்குட்பட்ட பகுதிகளில் ஆக்கிரமிப்பு அகற்றப்படாமல் உள்ளதால் போக்குவரத்திற்கு இடையூறாக உள்ளது.

பொறியாளர் முத்துக்குமார்: விரைவில் நடவடிக்கை எடுக்கப்படும்.

சண்முகப்பிரியா, தி.மு.க.,: மானாமதுரையில் புதிதாக அமைக்கப்பட்ட மின் மயானத்தை உடனடியாக திறக்க வேண்டும், பைபாஸ் ரோட்டில் உள்ள மயானத்தை சீரமைக்க நடவடிக்கை எடுக்க வேண்டும்.

பொறியாளர் முத்துக் குமார்: மின்மயானம் அடுத்த வாரத்திற்குள் திறக்கப்படும்.