தமிழகத்தில் வடகிழக்கு பருவமழை பரவலாக பெய்தாலும் சிவகங்கை மாவட்டத்தில் வெயிலின் தாக்கம் அதிகம் இருந்தது. நேற்று முன்தினம் மாலை ஆறரை மணிக்கு திடீரென பலத்த காற்றுடன் கூடிய கனமழை பெய்தது. திருப்புவனம் பழையூர் ராகவேந்திராநகர், உள்ளிட்ட தாழ்வான பகுதிகளில் மழை நீர் சூழ்ந்தது. திருப்புவனம் கண்மாய் மேட்டு மடையில் இருந்து பாசனத்திற்காக திறந்து விடப்பட்ட தண்ணீர் கால்வாய் துார் வாரப்படாததால் பழையூரில் நேதாஜிதெரு, ராகவேந்திரா நகரைச் சூழ்ந்தது. வீடுகளைச் சுற்றிலும் மூன்று அடி உயரத்திற்கு தண்ணீர் தேங்கியதால் 150 வீடுகளைச் சேர்ந்தவர்கள் வெளியேற முடியவில்லை. பேரூராட்சி ஊழியர்கள் அடைப்புகளை அகற்றி தண்ணீரை வெளியேற்றும் பணியில் ஈடுபட்டனர்.

பலத்த காற்று காரணமாக மடப்புரம், திருப்புவனத்தில் பல இடங்களில் மரக்கிளைகள் விழுந்து சேதத்தை ஏற்படுத்தின. மடப்புரத்தில் பொள்ளாச்சி பக்தரின் கார் மீது மரக்கிளை முறிந்து விழுந்ததில் கார் சேதமடைந்தது. மழை காரணமாக திருப்புவனம் பழையூரில் நெல் நடவு செய்த வயல்களில் தண்ணீர் நிரம்பியதால் விவசாயிகள் கவலையடைந்தனர்.