தேனி : தேனி பெரியகுளம் ரோட்டில் கோட்டைகளம் ரோடு, உழவர்சந்தை, ஸ்ரீராம் நகர், நியூ ஸ்ரீராம் நகர் உள்ளிட்ட பகுதிகள் அமைந்துள்ளன. இந்த பகுதிகளில் 200க்கும் மேற்பட்ட வீடுகளில் ஆயிரத்திற்கும் அதிகமானோர் வசிக்கின்றனர். இப்பகுதியில் கடந்த சில நாட்களாக காலையில் அடிக்கடி மின்வெட்டு ஏற்படுவது தொடர்கிறது. இதனால் பள்ளி, கல்லுாரி செல்லும் மாணவர்களை அனுப்புவதில் பெற்றோர் சிரமப்படுகின்றனர். இப்பகுதியில் தினமும் அறிவிக்கப்படாத மின்வெட்டாக உள்ளது. இதனை தவிர்க்க அதிகாரிகள் நடவடிக்கை எடுக்க பொது மக்கள் கோரிக்கை விடுத்துள்ளனர்.