ஆனால், கடந்த சில ஆண்டுகளாக வைகை அணை நீர்மட்டம் 50 சதவீத அளவிற்கு தொடர்ந்து நிலை நிற்கிறது. துார்வார நீரை வெளியேற்றிய பின் மழை இல்லை என்றால், வைகை அணையை நம்பி உள்ள பாசன நிலங்கள், குடிநீர் திட்டங்கள் முழுவதும் ஸ்தம்பித்து விடும்.

இதனால் அடுத்த கட்ட முயற்சியாக வைகை அணைக்கு நீர் வரும் ஆதாரங்களான சிற்றாறுகள், ஓடைகளில் இருந்து வரும் மணலை தடுக்கும் வகையில் ஆங்காங்கே சிறிய அளவிலான 200க்கும் மேற்பட்ட தடுப்பணைகள் அமைக்கப்பட உள்ளது. இதற்கான ஆய்வுப்பணிகளை வேளாண் பொறியியல் துறை, நீர்வளத்துறையினர் துவங்கி உள்ளனர்.

வைகை அணையில் மணல் சேர்வது குறையும் இது குறித்துஅதிகாரிகள் கூறுகையில், 'தடுப்பணைகள் அமைக்கும் திட்டம் மத்திய அரசு நிதியில் செயல்படுத்தப்பட உள்ளது. மலையடிவார பகுதியில் உள்ள விளை நிலங்களில் மணல் அதிகம் உள்ளது. இந்த மணல் மழைகாலத்தில் நீரோடை, சிற்றாறுகளுக்கு அடித்து செல்வதை தடுக்க விளை நிலங்களின் ஓரங்களில் கற்களை கொண்டு தடுப்புகள் ஏற்படுத்தப்பட உள்ளது. மண் அரிப்பை தடுக்கும் விதமாக சிங்கராஜபுரம், முத்தலாம்பாறை, போடி மலை அடிவாரப்பகுதிகளில் சிற்றாறு, ஓடைகளில் சிறிய அளவிலான சுமார் 200க்கும் மேற்பட்ட தடுப்பணைகள் அமைக்கப்பட உள்ளது. இந்த பணிகளை 3 ஆண்டுகளுக்குள் முடிக்க திட்டமிட்டுள்ளோம். இதன் மூலம் மணல் வைகை அணைக்கு வந்து சேருவது குறையும்', என்றனர்.