முல்லைப் பெரியாறு அணை நீரை நம்பி தென் தமிழகப்பகுதியில் 2 லட்சத்து 47 ஆயிரம் ஏக்கர் பரப்பில் இருபோக நெல் சாகுபடி நிலங்கள் உள்ளன. மேலும் ஒரு கோடி மக்களுக்கும் மேல் குடிநீர் ஆதாரமாகவும் இந்த அணை இருக்கிறது. அணை தமிழக நீர்வளத் துறையின் கட்டுப்பாட்டில் உள்ளது. எனினும் அணை அமைந்துள்ள பகுதி கேரளாவில் இருப்பதால் அம்மாநில இடையூறு அதிகமாக உள்ளது.

அணை பராமரிப்பிற்காக தமிழக அரசு சார்பில் செயற்பொறியாளர், உதவி செயற்பொறியாளர், உதவி பொறியாளர்கள், தொழில்நுட்ப உதவியாளர்கள், அலுவலர்கள், அலுவலக ஊழியர்கள், படகு டிரைவர்கள் என 40க்கும் மேற்பட்டோர் பணியில் உள்ளனர். இதில் அணை செயற்பொறியாளராக இருந்த சாம் இர்வின் , ஓராண்டிற்கு முன் பெரியாறு வைகை மதுரை கோட்டக் கண்காணிப்புப் பொறியாளராக பதவி உயர்வு பெற்று மாறுதலாகி சென்றார். அதன்பின் அணையில் இங்கு கூடுதல் பொறுப்பாக கவனித்து வந்தார். கடந்த ஓராண்டுக்கு மேலாகியும் நிரந்தர செயற்பொறியாளர் நியமிக்கப்படவில்லை. இதுகுறித்து தினமலர் நாளிதழில் செய்தி வெளியிடப்பட்டது.

இந்நிலையில் மஞ்சளாறு வடிநில கோட்டத்தில் உள்ள நிலக்கோட்டை சப் டிவிஷனில் உதவி செயற்பொறியாளராக இருந்த செல்வம் பதவி உயர்வு பெற்று பெரியாறு அணை செயற்பொறியாளராக பொறுப்பேற்றார். இரு மாநிலங்களுக்கு இடையே அணை பிரச்னை இருந்து வரும் நிலையில் இந்த நியமனம் முக்கியத்துவம் வாய்ந்தது என்பது குறிப்பிடத்தக்கது.