வைகை அணை நீர் தேக்கம் 10 சதுர மைல் பரப்பில் கடல்போல் பரந்து விரிந்துள்ளது. வைகை அணை நீர்த்தேக்கத்தில் மீன்வளத்துறை மூலம் மீன் குஞ்சுகள் வளர்ப்பிற்கு விடப்பட்டு, வளர்ந்தபின் அவற்றை பிடித்து விற்பனை செய்யப்பட்டது. கடந்த சில ஆண்டுகளுக்கு முன் வைகை அணையில் மீன் பிடிப்பதற்கான உரிமம் தனியாருக்கு ஏலம் விடப்பட்டது. இதனைத் தொடர்ந்து மீனவர் கூட்டுறவு சங்கத்தில் பதிவு பெற்ற மீனவர்கள் மூலம் மீன்கள் பிடிக்கப்பட்டு மீன்பிடி ஒப்பந்ததாரர் மூலம் விற்பனை செய்யப்படுகிறது. தற்போது அணையில் வளர்ப்புக்காக விடப்பட்ட கட்லா, மிருகாள், ரோகு வகை மீன்களுடன் ஆறா, ஜீலேபி, சொட்டைவாளை, உளுவை உட்பட இயற்கையாக வளரும் மீன்களும் அதிகம் உள்ளன. கடந்த சில மாதங்களுக்கு முன் அணை நீர்மட்டம் 65 அடி முதல் 71 அடி வரை பராமரிக்கப்பட்டது. கோடை துவங்கியதால் நீர் வரத்து குறைந்து அணை நீர்மட்டமும் குறைகிறது. நீர்மட்டம் நேற்று 61.25 அடியாக இருந்தது. அணை உயரம் 71 அடி. அணையில் நீர்மட்டம் குறைவதால் பிடிபடும் மீன்களின் எண்ணிக்கையும் அதிகரித்துள்ளது.