போடி அருகே மீனாட்சிபுரம், விசுவாசபுரம், பத்திரகாளிபுரம், காமராஜபுரம், உப்புக்கோட்டை, பெருமாள் கவுண்டன் பட்டி உள்ளிட்ட பல்வேறு கிராம பகுதிகளில் இருந்து தினமும் பள்ளி, கல்லூரி மாணவர்கள் போடி வந்து படித்து செல்கின்றனர். போடி அரசு போக்குவரத்து கழக டெப்போவில் இருந்து மீனாட்சிபுரம், பத்திரகாளிபுரம், டொம்புச்சரி வழியாக தேனிக்கும், தேனியில் இருந்து உப்புக்கோட்டை, டொம்புச்சேரி வழியாக போடிக்கும் அரசு பஸ்கள் இயக்கப் படுகின்றன.

பள்ளி, கல்லூரிகள் முடிந்த பின் மாலை 4:55 மணி, 5:45 மணிக்கு போடியில் இருந்து கிராம மார்க்கமாக தேனிக்கு பஸ்கள் இயக்கப்படுகிறது. இதனால் மாணவர்கள், பொதுமக்கள் 40 நிமிடம் போடி பஸ் ஸ்டாண்டில் பஸ்சிற்காக காத்திருக்க வேண்டியது உள்ளது.

மாலையில் பஸ் ஸ்டாண்டிற்குள் பஸ் வரும் முன்பே காத்திருக்கும் மாணவர்கள் ஓடி முண்டியடுத்து பஸ்சில் இடம் பிடித்து பயணம் செய் கின்றனர். வேகமாக வரும் பஸ்சில் ஓடி ஏறும் போது அடிக்கடி கீழே விழுந்து காயம் அடை கின்றனர்.

குறிப்பாக டி.என் 57. நா- 2055 பஸ்சில் நிற்பதற்கு கூட இடம் கிடைக்காத நிலையில் பொதுமக்கள் கடும் நெரிசலில் சிக்கி பயணம் செய்கின்றனர்.

இதனால் ஆபத்தை உணராமல் மாணவர்கள் பஸ் படிக்கடிக்கட்டில் தொங்கியபடி ஆபத்தான பயணம் மேற்கொள்கின்றனர். இதனை போக்குவரத்து நிர்வாகம், போலீசாரும் கண்டு கொள்வது இல்லை.

அசம்பாவிதம் ஏற்படும் முன் பள்ளி நேரங்களில் கிராம பகுதிகளுக்கு கூடுதல் பஸ்களை இயக்க அரசு போக்குவரத்து நிர்வாகம் நடவடிக்கை எடுக்க வேண்டும் என பொதுமக்கள், மாணவர்கள் வலியுறுத்தி உள்ளனர்.