கம்பத்தில் 10 ஏக்கர் பரப்பில் அமைந்துள்ளது கம்ப ராயப்பெருமாள்,காசி விஸ்வநாதர் கோயில். ஒரே வளாகத்தில் சிவனும், பெருமாளும் தனி தனி சன்னதிகளில் இருப்பது சிறப்பு அம்சமாகும்.

வலது கை சின்முத்திரையுடனும், இடது கையில் கமண்டலத்துடன் தட்சிணாமூர்த்தியும், ஆறு முகங்கள், 12 கைகளுடன் முருகனும், தெற்கு நோக்கி பைரவரும் உள்ளனர்.

கோயில்களில் மேற்கு, தெற்கு திசை நோக்கி இருக்கும் பைரவர்கள் அதிக சக்தி கொண்டவர்கள் என புராணங்கள் கூறுகிறது.

இங்குள்ள காசி விஸ்வநாதர் கோயில் 22 ஆண்டுகளுக்கு பின் திருப்பணிகள் உபயதாரர்கள் மூலம் மேற்கொள்ளப்பட்டது.

கும்பாபிஷேகத்திற்கான யாகசாலை பூஜைகள் நவ. 27 ல் அனுக்ஞை, விக்னேஸ்வரர் பூஜை, தன பூஜை, மகா கணபதி ஹோமம், கோ பூஜை, நவக்கிரக ஹோமங்கள் நடந்தன. இன்று நவ. 30ல் நான்காம் கால யாக பூஜையும், மாலை ஐந்தாம் கால யாக பூஜைகளும், நாளை (டிச.1, ) காலை 6:00 முதல் 7:00 மணிக்குள் மஹா கும்பாபிஷேகம் நடைபெறும்.

மஹா கும்பாபிேஷகம் நாளை அதிகாலை ஆறாம் கால யாக பூஜையும், 5 மணிக்கு பூர்ண ஹூதி தீபாரதனையும் நடைபெறும்.

இதனை தொடர்ந்து 5:30 மணிக்கு கடம் புறப்பாடு ஆகி காசி விஸ்வநாதர், காசி விசாலாட்சி அம்மன் பரிவார விமானங்களுக்கு புனித நீர் ஊற்றி மஹா கும்பாபி ஷேகம் நடைபெறும்.

தொடர்ந்து 7:00 மணிக்கு காசி விஸ்வநாதர், காசி விசாலாட்சி மற்றும் பரிவார மூர்த்தி களுக்கு மஹா கும்பாபிஷேகம் நடை பெறுகிறது.

கும்பாபிேஷகத்திற்கென கோயில் வளாகத்தில் மூலவர் சன்னதி தெற்கு வாசல் அருகில் காசி விஸ்வநாதருக்கு 9 குண்டங்கள், விசாலட்சி அம்மனுக்கு 9 குண்டங்கள், விநாயகர், தட்சிணாமூர்த்தி, பைரவர், முருகன் உள்ளிட்ட பரிவார தெய்வங்களுக்கு 8 குண்டங்கள் அமைக்கப்படுள்ளது.

மேற்கு பக்கம் சுவாமி, அம்பாளுக்கும், கிழக்கு பக்கம் பரிவார தெய்வங்களுக்கும் யாகசாலை அமைக்கப்பட்டுள்ளது.

பக்தர்கள் அந்த இடைவெளியில் அமர்ந்து இரண்டு யாகசாலை பூஜைகளையும் பார்த்து இறையருள் பெற்றனர்.

கும்பாபிஷேகத்தை முன்னிட்டு நகரமே விழாக்கோலம் பூண்டுள்ளது. தெருவெங்கும் வண்ண விளக்குகள், மாவிலை தோரணங்களால் அலங்கரிக்கப்பட்டுள்ளன.