மேகமலையில் மூணாறுக்கு நிகராக சீதோஷ்ண நிலை நிலவுகிறது. பசுமையான தேயிலை தோட்டங்களும், ஹைவேவிசில் ஆரம்பித்து மணலாறு வரை ரோட்டை ஒட்டியே நீண்டு செல்லும் மணலாறு நீர் தேக்கமும், மலைமுகடுகளை தொட்டு செல்லும் மேக கூட்டங்களும், தண்ணீர் அருந்த அணை பகுதிக்கு வரும் யானை, காட்டு மாடுகள் கூட்டமும் சுற்றுலா பயணிகளை உற்சாகப்படுத்தும்.

ஆனால் கடந்த ஒரு மாதத்திற்கு மேலாக சாரல் மழை பெய்து வருகிறது.

சில நாட்களாக இரவில் கனமழை பெய்து வருகிறது. தற்போது அதிக குளிர் நிலவுகிறது. எதிரே வரும் வாகனங்கள் தெரியாத அளவிற்கு பனி மூட்டங்களும் உள்ளன.

இதனால் தினமும் வரும் சுற்றுலா பயணிகளின் எண்ணிக்கை குறைந்துள்ளது.

இரவங்கலாறு, வெண்ணியாறு , மகாராசா மெட்டு, தூவானம் பகுதிகள் வெறிச்சோடி கிடக்கிறது.

இங்குள்ள அணைகளில் சேகரமாகும் தண்ணீரை பயன்படுத்தி தேவைக்கேற்ப காலை, மாலை நேரங்களில் சுருளியாறு மின் நிலையத்தில் மின்சாரம் உற்பத்தி செய்யப்படுகிறது.