ஆனால் தற்போது நடைபெறும் லோக்சபா தேர்தலில் இந்த டிரெண்ட் முற்றிலும் மாறிவிட்டது. தேர்தல் பிரசாரத்திற்கு வந்த கட்சிகளின் முக்கிய தலைவர்கள் வருகையில் பெண்கள் கூட்டம் அலைமோதுகிறது. பிரசார கூட்டங்களுக்கு பெண்கள் இவ்வளவு ஆர்வமாக வருகிறார்களா என விசாரித்தால் கூட்டத்திற்கு ஆட்களை திரட்ட கட்சியினர் 2 மணிநேரத்திற்கு தலா ரூ.200 முதல் ரூ.300 வரை கவனிப்பு செய்கின்றனர். எவ்வித சிரமம் இல்லாமல் பிரசாரத்தை வேடிக்கை பார்க்க பணம் தருவதால் 'கரும்பு திண்ண கூலியா' என்பது போல் எல்லா கட்சிகளுக்கும் பணத்திற்கான டோக்கன் பெற்று ஆண்களும், பெண்களும் திரள்கின்றனர். அ.தி.மு.க., பிரசாரத்தில் கூடிய அதே கூட்டம், தி.மு.க., பிரசாரத்திலும், அ.ம.மு.க., பிரசாரத்திலும் திரள்கின்றனர்.

தலைவர்கள் பிரசாரத்திற்கு தான் பணம் கொடுத்து ஆட்களை திரட்டுகிறார்கள் என்றால் தெருக்களில் வீடு, வீடாக ஓட்டு கேட்கவும் ஒரு மணிநேர ஓட்டு சேகரிக்க வருவோருக்கு தலா ரூ.100 வழங்குகின்றனர். இதற்கும் போட்டி போட்டி மக்கள் வருகின்றனர். தற்போது நிலவும் கவனிப்பு டிரெண்டால் தொகுதியில் யார் வெற்றி பெறுவார்கள், யார் பிரசாரத்திற்கு கூட்டம் கூடுகிறது, யாருக்கு ஆதரவு என்பதை கணிக்க முடியாமல் பார்வையாளர்கள் திணறுகின்றனர். இந்த தொகுதியில் யாருக்கு வெற்றி என விபரமான நபர்களிடம் கேட்டால் கூட ஒரே வரியில் 'பணம் கொடுத்தால் எல்லோருக்கும் கூட்டம் கூடுகிறது. இதனால் கணிக்க முடியவில்லை' என கூறி நழுவி விடுகின்றனர். பணத்திற்காக சேரும் கூட்டத்தால் அரசியல் கட்சியினர் முடிவை அறிய முடியாமல் திணறுகின்றனர்.