பெரியகுளம் அருகே 8 கி.மீ., தொலைவில் கும்பக்கரை அருவிஉள்ளது. கொடைக்கானல் மலைப்பகுதி வட்டக்காணல், பாம்பார்புரம் பகுதியில் பெய்யும் மழை, கும்பக்கரை பகுதியில் பெய்யும் மழையால் அருவிக்கு தண்ணீர் வருகிறது. அருவிப்பகுதியில் கனமழையால் அக்.11 முதல் வெள்ளப் பெருக்கினால் குளிக்க வனத்துறை தடை விதித்தது. அடுத்தடுத்த நாட்களில் வடகிழக்கு பருவமழையால் தண்ணீர் வரத்து அதிகரித்தது. அக்.20ல் தீபாவளியன்று சுற்றுலா பயணிகள் குளிப்பதற்கு அனுமதிக்கப்படுவர் என எதிர்பார்த்தனர்.

அருவியில் வெள்ளப்பெருக்கு தொடர்ந்தது. நேற்று முன்தினம் மாலையில் தண்ணீர் வரத்து சீரானது. இதனால் 18 நாட்களுக்கு பிறகு நேற்று (அக் 29) முதல் கும்பக்கரை அருவியில் சுற்றுலா பயணிகள் குளிக்க அனுமதிக்கப்பட்டனர். அருவி யில் வெள்ளியை உருக்கி ஊற்றியது போல் தண்ணீர் பளீச் என கொட்டியது.அருவிப்பகுதி வலது புறம் 50 மீட்டர் தூரத்திற்கு பாறைகள் தூய்மையானது. அருவியில் குளித்து சுற்றுலா பயணிகள் மகிழ்ச்சி அடைந்தனர்.

தொடர் கண்காணிப்பு கும்பக்கரை அருவியில் குளிக்க அனுமதிக்கப்பட்ட போதிலும், அருவிப்பகுதியில் வெயில், மேகமூட்டம் என தட்பவெப்பநிலை 'மாறி மாறி' நிலவியது. மழை பெய்கிறதா என வனத்துறையினர் கண் காணித்து வருகின்றனர்.