தேனி மாவட்டத்தையும் கேரளாவையும் இணைக்க குமுளி, கம்பமெட்டு மற்றும் போடிமெட்டு பகுதிகள் உள்ளன. இந்த மூன்று பாதைகள் வழியாக இரு மாநில போக்குவரத்து நடைபெறுகிறது. போடிமெட்டு மற்றும் குமுளி ரோடுகள் தேசிய நெடுஞ்சாலை கையகப்படுத்தி உள்ளது. கம்பமெட்டு ரோடு மாநில நெடுஞ்சாலைத்துறை வசம் உள்ளது.

கேரளாவிற்குள் செல்ல குமுளி மற்றும் போடிமெட்டு வழியாக செல்ல அரசு போக்குவரத்துக் கழகம் பஸ் வசதிகள் செய்துள்ளது. ஆனால் இந்த ரோட்டின் வழியாக தினமும் நூற்றுக்கணக்கான ஜீப் வாகனங்களில் ஏலத் தோட்ட தொழிலாளர்களும், விவசாயிகளும் கேரளாவில் உள்ள ஏலத்தோட்டங்களுக்கு செல்கின்றனர்.

அதே போன்று இடுக்கி மாவட்டத்தில் வசிப்பவர்களும் தினமும் தேனி மாவட்டத்திற்கு நூற்றுக்கணக்கில் வந்து செல்கின்றனர். ஆனால் நெடுங்கண்டம், கட்டப்பனை நகரங்களுக்கு மட்டும் பஸ் வசதி உள்ளது.

கம்பமெட்டில் பஸ் ஸ்டாண்ட் ஏற்படுத்தவும், கம்பத்திலிருந்து கம்பமெட்டுக்கு அடிக்கடி பஸ்களை இயக்கவும் இரு மாநில பொதுமக்கள் கோரிக்கை விடுத்துள்ளனர். தற்போது குமுளியில் பஸ் ஸ்டாண்ட் கட்டப்பட்டு வருகிறது. அதே போல் கம்பமெட்டில் பஸ் ஸ்டாண்ட் கட்ட நடவடிக்கை எடுக்க வேண்டும்.

கேரளாவிற்குள் பஸ் இயக்க வேண்டும் என்றால் கேரளாவிடம் அனுமதி கேட்க வேண்டும். கம்பமெட்டு வரை என்றால் கேட்க தேவையில்லை. மேலும் கம்பமெட்டில் பஸ் ஸ்டாண்ட் அமைக்க இடமும் உள்ளது. வனத்துறை ஊழியர் குடியிருப்பு பாழடைந்து பயனற்றதாக உள்ளது. அந்த இடத்தில் பஸ் ஸ்டாண்ட் கட்டலாம். இதனால் அரசிற்கு வருவாயும் கிடைக்கும்.

இருமாநில பொதுமக்களுக்கு குறிப்பாக தோட்ட தொழிலாளர்களுக்கு உதவியாக இருக்கும். எனவே பஸ் ஸ்டாண்ட் கட்டவும், கூடுதல் பஸ்களை இயக்கவும் தமிழக அரசு நடவடிக்கை எடுக்க வேண்டும்.