லோயர் கேம்ப் பம்பிங் ஸ்டேஷனில் இருந்து குடிநீர் பம்பிங் செய்து கம்பம், கூடலுார், புதுப்பட்டி, அனுமந்தன்பட்டி, உத்தமபாளையம், கோம்பை, பண்ணைப்புரம், தேவாரம் உள்ளிட்ட பல ஊர்களுக்கு வினியோகம் ஆகிறது. குடிநீர் வாரியத்தின் சார்பில் கோம்பை, பண்ணைப்புரம், தேவாரத்திற்கு 2 பகிர்மான வழித்தடங்கள் மூலம் குடிநீர் வினியோகம் ஆகிறது. அதில் பழைய பகிர்மான பிரிவு கம்பம் நகரின் மெயின்ரோடு வழியாக செல்கிறது.

நேற்று காலை 7:00 மணியளவில் அரசு போக்குவரத்து கழக பணிமனைக்கு எதிரில், பயணியர் நிறுத்தம் அருகில் உள்ள ஜங்சன் பாயிண்டில் 'ஏர் வால்வு' உடைந்தது.

இதனால் குடிநீர் குபு, குபுவென வெளியேற துவங்கியது. காலை 7:00 மணி முதல் 10:00 மணிக்குள் லட்சக்கணக்கான லிட்டர் குடிநீர் சாக்கடைக்கு சென்றது. குடிநீர் வாரிய அதிகாரிகள் லோயர் கேம்பில் தண்ணீரை நிறுத்தினார்கள். அதன் பின் காலை 11:00 மணியளவில் முழுமையாக நின்றது.