கடந்த மாதம், 29ம் தேதி நடந்த ஆடிக்கிருத்திகை விழாவில் பல லட்சக்கணக்கான பக்தர்கள் காவடிகளுடன் முருகப்பெருமானை தரிசித்தனர்.

ஆடிக்கிருத்திகை அடுத்து வரும் ஆவணி மாத கிருத்திகை என்பதால், நேற்று காலை, 6:00 மணி முதல், இரவு, 9:30 மணி வரை பக்தர்கள் பொதுவழியில், நீண்ட வரிசையில் நான்கு மணி நேரம் காத்திருந்து மூலவரை தரிசித்தனர்.

பெரும்பாலான பக்தர்கள் காவடிகளுடன் வந்து தங்களது நேர்த்திக் கடனை செலுத்தினர்.

கிருத்திகை அதிகாலை, 4:30 மணிக்கு மூலவருக்கு சிறப்பு அபிஷேகம், தங்கவேல், தங்ககிரீடம் மற்றும் வைர ஆபரணங்கள் அணிவித்து சிறப்பு தீபாராதனை நடந்தது.

காலை, 9:30 மணிக்கு காவடி மண்டபத்தில் உற்சவர் முருகப்பெருமானுக்கு பஞ்சாமிர்த அபிஷேகம் மற்றும் அலங்காரம் தீபாராதனை நடந்தது.

இரவு, 7:00 மணிக்கு வெள்ளி மயில் வாகனத்தில் உற்சவர் முருகப்பெருமான் வள்ளி தெய்வானையுடன் மாடவீதியில் திருவீதியுலா வந்து பக்தர்களுக்கு அருள்பாலித்தார்.

ஆர்.கே.பேட்டை அடுத்த அத்திமாஞ்சேரிபேட்டையின் தென்மேற்கில் உள்ளது நெல்லிக்குன்றம் சுப்ரமணிய சுவாமி மலைக்கோவில்.

இந்த கோவிலில் நேற்று ஆவணி கிருத்திகையை ஒட்டி, காலை 10:00 மணிக்கு சிறப்பு அபிஷேகம், அலங்காரம் நடந்தது.

மகா தீபாராதனையை தொடர்ந்து சுவாமி தரிசனம் நடைபெற்றது. மாலை 6:00 மணிக்கு, உற்சவர் பெருமான், மலைக்கோவிலில் உள்புறப்பாடு எழுந்தருளினார்.

இதே போல், நெடியம் கஜகிரி செங்கல்வராய சுவாமி மலைக்கோவில், கரிக்கல் குமரேசகிரி மலைக்கோவில்களிலும் நேற்று கிருத்திகை சிறப்பு உற்சவம் நடைபெற்றது.