இதில் ஊத்துக்கோட்டை பஜார் பகுதியில் வியாபாரிகள் சாலையை ஆக்கிரமித்து கடைகள் வைத்துள்ளனர். அதிகளவு வாகனங்கள் செல்வதால், போக்குவரத்து நெரிசல் ஏற்படுகிறது. தாலுகா தலைநகரான ஊத்துக்கோட்டையில் வட்டாட்சியர், டி.எஸ்.பி., உள்ளிட்ட உயரதிகாரிகளின் அலுவலங்கள் இங்கு உள்ளது. ஆனாலும் போக்குவரத்து நெரிசலுக்கு தீர்வு காணப்படவில்லை.

இங்குள்ள பள்ளிக்கு செல்லும் மாணவ, மாணவியர் பஜார் வழியே சென்று தான் அரசு மற்றும் தனியார் பள்ளிக்கு செல்ல வேண்டி உள்ளது. வழக்கமாக ஏற்படும் போக்குவரத்து நெரிலால், மாணவர்கள் குறித்த நேரத்திற்கு பள்ளிக்கு செல்ல முடிவதில்லை. இங்குள்ள அரசு மருத்துவனைக்கு நோயாளிகளை அழைத்து செல்லும், ‛108' ஆம்புலன்ஸ் போக்குவரத்து நெரிசலில் சிக்கி விடுகிறது.

இதனால் மருத்துவமனைக்கு குறித்த நேரத்தில் செல்ல முடியாமல் உயிரிழப்பு ஏற்படும் அபாயம் உள்ளது. சாலை ஆக்கிரமிப்பை தடுக்க வேண்டிய நெடுஞ்சாலைத் துறை மற்றும் போக்குவரத்து நெரிசலை கட்டுப்படுத்த வேண்டிய காவல் துறை எவ்வித நடவடிக்கையும் எடுக்காததால், பொதுமக்கள், மாணவர்கள் தினமும் அவதிப்படுகின்றனர். பெரிய அளவில் பாதிப்பு ஏற்படும் முன் ஊத்துக்கோட்டை பஜார் பகுதியில் ஆக்கிரமிப்பை அகற்றி போக்குவரத்தை சீர்படுத்த வேண்டும் என்ற கோரிக்கை எழுந்துள்ளது.