திருவள்ளூர் மாவட்டத்தில், திருவள்ளூர், திருத்தணி, பள்ளிப்பட்டு, புழல், சோழவரம், மீஞ்சூர், கும்மிடிப்பூண்டி, பூண்டி, எல்லாபுரம் உட்பட, 14 ஊராட்சி ஒன்றியங்கள் உள்ளன. இவற்றில், குறைந்தபட்சமாக, புழல் ஒன்றியத்தில் ஏழு ஊராட்சிகளும், அதிகபட்சமாக, கும்மிடிப்பூண்டி ஒன்றியத்தில் 61 ஊராட்சிகளும் உள்ளன.

மாநகராட்சி, நகராட்சி, பேரூராட்சிகளின் எல்லைகள் விரிவாக்கம் மற்றும் புதிய நகராட்சிகள், பேரூராட்சிகள் ஏற்படுத்தும் பணிகளை, தமிழக அரசு மேற்கொண்டு வருகிறது. அதன்படி, 60 ஊராட்சிகளுக்கு மேல் உள்ள ஊராட்சி ஒன்றியங்களை இரண்டாக பிரித்து, புதிய ஊராட்சி ஒன்றியங்களை உருவாக்கும் திட்டத்தை தமிழக அரசு மேற்கொண்டு வருகிறது.

அதன்படி, 61 ஊராட்சிகள் கொண்ட கும்மிடிப்பூண்டி ஒன்றியத்தை இரண்டாக பிரித்து, புதிய ஊராட்சி ஒன்றியத்தை ஏற்படுத்த மாவட்ட நிர்வாகம், திட்ட வரைவு கேட்டு இருந்தது.

இதுகுறித்து திட்ட வரைவு தயாரித்த கும்மிடிப்பூண்டி ஒன்றிய ஒன்றிய நிர்வாகம், கும்மிடிப்பூண்டி ஒன்றியத்தில் இருந்து, 22 ஊராட்சிகளை பிரித்து, புதிதாக மாதர்பாக்கம் ஊராட்சி ஒன்றியத்தை ஏற்படுத்தி முதல்கட்ட ஒப்புதலுக்கு அனுப்பியுள்ளது.

புதுகும்மிடிப்பூண்டி மற்றும் பெத்திக்குப்பம் ஊராட்சிகள், கும்மிடிப்பூண்டி பேரூராட்சியுடன் இணைக்கப்பட இருப்பதால், அந்த இரு ஊராட்சிகளை தவிர, 37 ஊராட்சிகள் கொண்ட கும்மிடிப்பூண்டி ஊராட்சி ஒன்றியம் ஏற்படுத்தப்பட்டுள்ளது.

புதிதாக வரவிருக்கும் செங்குன்றம் நகராட்சியுடன், புழல் ஊராட்சி ஒன்றியம் இணைக்கப்பட உள்ளது. புழல் ஊராட்சி ஒன்றியத்தை இணைக்கும் பட்சத்தில், அந்த ஒன்றிய அலுவலக பணியாளர்கள், புதிதாக ஏற்படுத்தவுள்ள மாதர்பாக்கம் ஊராட்சி ஒன்றியத்தில் நியமிக்க வாய்ப்பு இருப்பதாக கூறப்படுகிறது.

கும்மிடிப்பூண்டி மற்றும் மாதர்பாக்கம் ஆகிய இரு ஊராட்சி ஒன்றியங்களின் கீழ், ஊராட்சிகள் பிரித்து கலெக்டரின் ஒப்புதலுக்கு கருத்துரு அனுப்பப்பட்டது. அதன் மீது மாவட்ட நிர்வாகம் உரிய ஆய்வு செய்த பின், இரு ஒன்றியங்களில் இடம்பெறும் ஊராட்சிகளின் பட்டியல் இறுதி செய்யப்படும்.

ஊராட்சி ஒன்றிய அலுவலர்,

கும்மிடிப்பூண்டி.