திருவள்ளூர் கலெக்டர் அலுவலகத்தில் நேற்று, ஒன்பது குளிர்சாதனம் மற்றும் ஒரு சாதாரண பேருந்து என, 10 புதிய பேருந்துகள் துவக்க விழா, கலெக்டர் பிரதாப் தலைமையில் நேற்று நடந்தது.

சிறுபான்மையினர் நலத்துறை அமைச்சர் நாசர், புதிய பேருந்துகளை துவக்கி வைத்து தெரிவித்ததாவது:

திருவள்ளூர் மாவட்டத்தில் இருந்து, ஆந்திர மாநிலம் நெல்லுார், திருப்பதி வழித்தடத்தில், புதிதாக ஒன்பது குளிர்சாதனம் மற்றும் ஒரு சாதாரண பேருந்து என, 10 பேருந்துகள் துவக்கி வைக்கப்பட்டுள்ளது.

மாவட்டத்தில் மொத்தம், 224 பேருந்துகள் இயக்கப்பட்டு வருகின்றன. அவற்றில், 72 நகரம் மற்றும் 152 புறநகர பேருந்துகள்.

தற்போது, 67 புதிய பேருந்து சேவைகளும், அதில், 15 இலவச விடியல் பயண பேருந்துகளும் இயக்கப்பட்டு வருகின்றன. இந்த இலவச விடியல் பயண திட்டத்தால், அனைத்து மகளிரும் தமிழகம் முழுதும் இலவசமாக பேருந்துகளில் பயணம் செய்து வருகின்றனர்.

இதனால், மாதத்திற்கு சராசரியாக 838 ரூபாய் பயண செலவு தினமும் மிச்சப்படுகிறது. ஆனால், அரசுக்கு தினமும் 57 லட்சம் ரூபாயும், மாதத்திற்கு 7,000 கோடி ரூபாயும் செலவினம் கூடுகிறது.

இவ்வாறு அவர் தெரிவித்தார்.