நேற்று அதிகாலை 2:30 மணிக்கு, பெட்ரோல் நிரப்புவதற்காக, காலி சரக்கு ரயில் சென்று கொண்டிருந்தது.

சென்னை சென்ட்ரல் ரயில் நிலையம் அருகே, எதிர்பாராத விதமாக சரக்கு ரயிலின் இரண்டு பெட்டிகள், பலத்த சத்தத்துடன் தண்டவாளத்தில் இருந்து விலகி, தடம் புரண்டன. சுதாரித்த ஓட்டுனர், ரயிலை உடனடியாக நிறுத்தி, இது குறித்து கட்டுப்பாட்டு அதிகாரிகளுக்கு தகவல் தெரிவித்தார்.

அதிகாரிகளும், 50க்கும் மேற்பட்ட ஊழியர்களும், சம்பவ இடத்திற்கு விரைந்தனர்.

தடம் புரண்ட ரயில் பெட்டிகளின் சக்கரங்களை, தண்டவாளத்தில் ஓடும் வகையில் பொருத்தும் பணியில் ஈடுபட்டனர்.

காலை 6:00 மணிக்கு, மீட்பு பணிகள் முழுமையாக முடிந்து, ரயில் பெட்டிகள் பணிமனைக்கு எடுத்துச் செல்லப்பட்டன.

அதிகாலையில் நடந்த இந்த விபத்தால், எந்த பாதிப்பும் ஏற்படவில்லை. அதேபோல், சென்ட்ரல் ரயில் நிலையம் மற்றும் பேசின் பிரிட்ஜ் இடையே உள்ள பணிமனையில் நேற்று நள்ளிரவு 12:00 மணிக்கு, டீசல்ரயில் இன்ஜின் தடம் புரண்டது. மூன்று சக்கரங்கள், தண்டவாளத்தில் இருந்து தரையிறங்கின. பணிமனையில் இருந்து இன்ஜினை வெளியே எடுத்து வந்தபோது தண்டவாளத்தில் இருந்து இன்ஜின் இறங்கியது.

இதனால், பணிமனையில் இருந்து, அடுத்தடுத்த ரயில்கள் வெளியே வருவதில் சிரமம் ஏற்பட்டது. பணிமனையில் தடம் புரண்ட இன்ஜின், மூன்று மணி நேர போராட்டத்திற்கு பின் மீட்கப்பட்டது.