திருத்தணி ஒன்றியம் கே.ஜி.கண்டிகை மற்றும் தலையாறிதாங்கல் கிராமங்களில் உள்ள ஷீரடி சாய்பாபா கோவில்களில் நேற்று வியாழக்கிழமை ஒட்டி, மூலவருக்கு காலையில் பாலாபிஷேகம் மற்றும் சிறப்பு தீபாராதனை நடந்தது.

மதியம், 12:00 மணிக்கு மூலவருக்கு சிறப்பு அலங்காரம் மற்றும் மதிய ஆரத்தி நடந்தது. மாலை, 6:00 மணிக்கு உற்சவர் சிறப்பு அலங்காரத்தில், கோவில் வளாகத்தில் மூன்று முறை வலம் வந்து பக்தர்களுக்கு அருள்பாலித்தார். இதில் திருத்தணி, கே.ஜி.கண்டிகை, தலையாறிதாங்கல் மற்றும் சுற்றியுள்ள கிராமங்களில் இருந்து திரளான பக்தர்கள் வழிப்பட்டனர்.

ஆர்.கே.பேட்டை அடுத்த காந்தகிரி மலையடிவாரத்தில் உள்ளது சாய்பாபா கோவில். இந்த கோவிலில் நேற்று காலை 10:00 மணிக்கு சாய்பாபாவுக்கு சிறப்பு தீபாராதனை நடந்தது. மாலை 6:00 மணிக்கு தேஜ் ஆரத்தி செய்யப்பட்டது.

ஆர்.கே.பேட்டை, சந்திரவிலாசபுரம், மோசூர், சுந்தரராஜபுரம், அம்மையார்குப்பம் உள்ளிட்ட கிராமங்களை சேர்ந்த பக்தர்கள் பங்கேற்றனர். இதே போல், பத்மாபுரம் சாய்பாபா கோவில், பள்ளிப்பட்டு அடுத்த கரிம்பேடு சாய்பாபா கோவில்களிலும் நேற்று சிறப்பு வழிபாடு நடத்தப்பட்டது.