திருவள்ளூர் அரசு மருத்துவக் கல்லூரி மருத்துவமனையில், மது மற்றும் போதை மீட்பு மறுவாழ்வு மையத்தினை, கலெக்டர் பிரதாப் பார்வையிட்டு விபரங்களை கேட்டறிந்தார்.

பின் அவர் பேசியதாவது:

தமிழக முதல்வர் உத்தரவுப்படி, திருவள்ளூர் அரசு மருத்துவக் கல்லூரி மருத்துவமனையில், மனநல மருத்துவ பிரிவின் கீழ் மது மற்றும் போதை மீட்பு மறுவாழ்வு மையம் - கலங்கரை, 59 லட்சத்து, 99,380 ரூபாய் மதிப்பில் அமைக்கப்பட்டு உள்ளது.

இம்மையத்திற்கென்று தனியாக மருத்துவ உபகரணங்கள், சிறப்பு மருத்துவர்கள், செவிலியர்கள், மருத்துவமனை பணியாளர்கள் ஆகியோர் நியமிக்கப்பட்டுள்ளனர்.

திருவள்ளூரில் பல்வேறு சூழ்நிலை காரணமாக போதையின் பிடியில் அகப்பட்டு உள்ளவர்களை மீட்டெடுத்து உரிய சிகிச்சை அளித்து அவர்களுக்கு புனர்வாழ்வு அளிக்கும் வகையில் இம்மையம் செயல்படும்.

இவ்வாறு அவர் பேசினார்.

நிகழ்ச்சியில், அரசு மருத்துவக் கல்லூரி மருத்துவமனை முதல்வர் ரேவதி, மருத்துவமனை கண்காணிப்பாளர் சுரேஷ்பாபு, நிலைய மருத்துவ அலுவலர் ராஜ்குமார், மருத்துவமனை துணை கண்காணிப்பாளர் விஜயராஜ் மற்றும் மருத்துவர்கள், பணியாளர்கள் உட்பட பலர் பங்கேற்றனர்.