திருப்பந்தியூர் பகுதியில் அரசு பள்ளிக்குச் செல்லும் சாலையில் மாட்டுச்சாணம், கழிவுநீர் தேங்குவதால், மாணவர்கள் கடும் சிரமப்பட்டு வருகின்றனர். மேலும், மாணவர்களின் சுகாதாரம் கேள்விக்குறியாகி உள்ளது.

கடம்பத்துார் ஒன்றியத்துக்கு உட்பட்ட திருப்பந்தியூர் ஊராட்சியில் உள்ள அரசு உயர் நிலைப்பள்ளியில், 100க்கும் மேற்பட்ட மாணவ - மாணவியர் படித்து வருகின்றனர்.

மேலும் உயர்நிலைப்பள்ளி அருகே உள்ள தொடக்கப் பள்ளியிலும், 50க்கும் மேற்பட்ட மாணவ - மாணவியர் படித்து வருகின்றனர்.

இந்த பள்ளியைச் சுற்றியுள்ள வீடுகளில் கால்நடைகள் வளர்த்து வருகின்றனர்.

இதனால், பள்ளிக்கு வரும் சாலை முழுதும் மாட்டுச் சாணங்களும், குப்பையும் நிறைந்து காணப்படுகின்றன.

இதனால் ஏற்படும் துர்நாற்றத்தால் மாணவ - மாணவியர் சிரமப்படுவதுடன், தொற்று நோய் பரவும் அபாயமும் ஏற்பட்டுள்ளது.

மேலும், மாணவ - மாணவியரின் சுகாதாரம் கேள்விக்குறியாகி உள்ளதால், மாவட்ட நிர்வாகம் இதற்கு தகுந்த நடவடிக்கை எடுக்க வேண்டுமென, சமூக ஆர்வலர்கள் கோரிக்கை விடுத்துள்ளனர்.