அப்பகுதி மக்கள் புகார் அளித்தும், மின்வாரிய அதிகாரிகள் நடவடிக்கை எடுக்காமல் தாமதித்தனர். நேற்று அதிகாலை அப்பகுதியை சேர்ந்த விவசாயி முருகன், 40, தன் தோட்டத்திற்கு அவ்வழியாக சென்றுள்ளார். எதிர்பாராதவிதமாக அவரது கழுத்து பகுதியில் மின்கம்பி சிக்கியதால் மின்சாரம் பாய்ந்து சம்பவ இடத்திலேயே அவர் உயிரிழந்தார். சில மணி நேரம் கழித்தே அப்பகுதியை சேர்ந்தவர்கள் பார்த்து மின்வாரிய அதிகாரிகளுக்கும், கயத்தாறு போலீசாருக்கும் தகவல் தெரிவித்தனர்.

விடுமுறை நாள் என்பதால் தகவல் தெரிவிக்கப்பட்ட ஒரு மணி நேரத்திற்கும் பின்னரே மின்வாரிய ஊழியர்கள் வந்து மின்சாரத்தை துண்டித்தனர். அதன் பிறகே போலீசார் முருகன் உடலை மீட்டு பிரேத பரிசோதனைக்காக கோவில்பட்டி அரசு மருத்துவமனைக்கு அனுப்பினர். கயத்தாறு போலீசார் விசாரிக்கின்றனர். அலட்சிய மின்வாரிய ஊழியர்கள் மீது நடவடிக்கை எடுக்க, அப்பகுதி விவசாயிகள் கோரிக்கை விடுத்துள்ளனர்.