திருப்பத்துார் மாவட்டம், நாட்றம்பள்ளி அடுத்த வெலக்கல்நத்தம், செத்தமலை வனப்பகுதியில் இருந்து ஒரு தாய்க் கரடி மற்றும் இரு குட்டிகள், நேற்று அப்பகுதியிலுள்ள விவசாய நிலத்தில் புகுந்தன. அங்கு பணியில் ஈடுபட்டிருந்த மணிமேகலை, 27, என்பவர் கரடியை பார்த்து கூச்சலிட்டார்.

அவரை கரடி துரத்திச் சென்று கடித்தது. அவரது அலறல் சத்தம் கேட்டு, அக்கம்பக்கத்தினர் வந்தபோது, இரு குட்டிக்கரடிகள் வனத்திற்குள் தப்பி ஓடின. தாய்க்கரடி பேட்டராயன் பகுதியிலுள்ள ராமி என்பவரின் வீட்டிற்குள் புகுந்தது.

நாட்றம்பள்ளி வனத்துறையினர், போலீசார் மற்றும் தீயணைப்பு துறையினர் சம்பவ இடத்திற்குச் சென்று, கரடியை வலைவீசி பிடித்து, கூண்டுக்குள் அடைத்து, அடர்ந்த வனத்தில் விட நடவடிக்கை எடுத்தனர். படுகாயமடைந்த மணிமேகலை, புதுப்பேட்டை அரசு மருத்துவமனையில் சேர்க்கப்பட்டார். இந்த சம்பவம் கிராமத்தில் பரபரப்பை ஏற்படுத்தியது.