கோவை, நீலகிரி மாவட்ட அணைகள் நிரம்பி, தண்ணீர் அதிகளவில் வெளியேற்றப்பட்டு வருவதால், நொய்யல் ஆற்றில் வெள்ளம் வழிந்தோட துவங்கியிருக்கிறது.கோவை மாவட்டத்தில் இருந்து வரும் நொய்யல் ஆறு, திருப்பூரின் மையப்பகுதியை கடந்து, கரூர் மாவட்டத்துக்குள் நுழைகிறது. 'தென்மேற்கு பருவமழை பெய்ய துவங்கியிருப்பதால் அணைகள் நிரம்பி, குடிநீர் தேவை பூர்த்தி செய்யப்படும்' என, மக்கள் எதிர்பார்க்கின்றனர்; விவசாயிகளும் மகிழ்ச்சியடைந்துள்ளனர்.

ஈரோடு, கோவை, திருப்பூர் மாவட்ட மக்களின், 60 ஆண்டு கடந்த எதிர்பார்ப்பான அத்திக்கடவு - அவிநாசி நீர் செறிவூட்டும் திட்டம், மேற்கு தொடர்ச்சி மலை பகுதியில் பெய்யும் பருவமழையை நம்பியே உள்ள நிலையில், தற்போது பெய்து வரும் தென்மேற்கு பருவமழையில் மேட்டுப்பாளையம், பில்லுார் அணை நிரம்பி, தண்ணீர் திறந்து விடப்பட்டிருக்கிறது. இதனால், பவானி ஆற்றில் வெள்ளப் பெருக்கு ஏற்பட்டிருக்கிறது. கரையோர மக்கள், பாதுகாப்பான இடங்களுக்கு செல்லுமாறு, அறிவுறுத்தப்பட்டுள்ளனர்.