நேற்று, 10ம் வகுப்பு பொதுத்தேர்வில், ஆங்கில தேர்வு நடந்தது. மாவட்டத்தில், 29 ஆயிரத்து 887 மாணவ, மாணவியர் தேர்வெழுதும் தகுதி பெற்றிருந்தனர்.

அவர்களில், 29 ஆயிரத்து 322 பேர் தேர்வெழுதினர்; 204 பேர் ஆங்கில தேர்வில் இருந்து விலக்கு பெற்றிருந்தனர்; 361 பேர் 'ஆப்சென்ட்' ஆகினர்.

தனித்தேர்வர்களாக விண்ணப்பித்த, 528 பேரில், 460 பேர் தேர்வெழுதினர்; 2 பேர் விலக்கு பெற்றிருந்த நிலையில், 66 பேர் 'ஆப்சென்ட்' ஆகினர்.

மாணவர்கள் கூறியதாவது:

மணிவேல்: ஆங்கிலத் தேர்வு, ரொம்ப எளிதாக இருந்தது. சில வினாக்களை தவிர, மற்ற வினாக்கள் அனைத்தும், புத்தகத்தின் பின்பக்கத்தில் இருந்து தான் கேட்கப்பட்டிருந்தன. ஆசிரியர்கள் சுட்டிக்காட்டிய வினாக்கள், கேட்கப்பட்டிருந்தன.

அக்ஷயா: தேர்வு மிக எளிதாக இருந்தது. 'போயம்' பகுதி சற்று கடினமாக இருந்தாலும், விடையளிக்கும் வகையில் தான் இருந்தது. அனைத்து மதிப்பெண் வினாக்களுக்கும் விடைளிக்கும் வகையில் தான், கேள்வித்தாள் அமைந்திருந்தது; நேரம் தான் போதவில்லை.

கமலேஷ்: புத்தகத்தின் பின்பக்கத்தில் இருந்து தான் பெரும்பாலான கேள்விகள் கேட்கப்பட்டிருந்தன; மிக எளிதாக தேர்ச்சி பெற முடியும். முதல் பகுதி பாடங்களில் இருந்து அதிகளவு கேள்வி, கேட்கப்பட்டிருந்தது. ஆங்கில தேர்வு என்ற அச்சம், சுத்தமாக இல்லாமல் போனது.

அக்பர்: ஐந்து மதிப்பெண் வினாக்கள், சற்று குழப்பும் வகையில் இருந்தாலும், கடினம் என்று கூற முடியாது. அனைத்து வினாக்களுக்கும் விடையளிக்கும் வகையில் தான் வினாத்தாள் இருந்தது; நிச்சயம் அதிக மதிப்பெண் பெற முடியும்.

90 மார்க் எளிதாக பெறலாம்

ஆங்கில வினாத்தாள் பொதுவாக எளிதாகவே இருந்தது; 90 மதிப்பெண், எளிதாக எடுக்க முடியும். சில கேள்விகள், துணை பாடங்களில் இருந்து கேட்கப்பட்டிருந்தன. 'புளுபிரின்ட்' இல்லாததால், புத்தகத்தின் எந்த பகுதியில் இருந்தும் கேள்விகள் கேட்க முடியும். 'பேட்டன்' படி தான் நாங்கள் சொல்லிக் கொடுக்கிறோம். இதனால், மாணவர்கள் எளிதாக தேர்வை எதிர்கொள்ள முடிந்தது.

- கல்பனா, ஆங்கில ஆசிரியை.

குமார்நகர் மாநகராட்சி பள்ளி.