பழநி தண்டாயுதபாணி சுவாமிகள் கோவிலில், நடைபெறும் தைப்பூச விழா பிரசித்தி பெற்றதாகும். விழாவுக்கு, பாதயாத்திரையாகவும், பஸ்களிலும், பல்லாயிரக்கணக்கான பக்தர்கள் உடுமலை சுற்றுப்பகுதிகளில் இருந்து செல்கின்றனர்.

பாதயாத்திரை பக்தர்கள் தரிசனம் முடிந்து திரும்ப வரும் போது, போதிய பஸ்கள் இல்லாமல், தவிக்கின்றனர். இதே போல், விழாவுக்கு செல்பவர்களும், பஸ்களில் நெருக்கடியாக பயணித்து செல்ல வேண்டியுள்ளது.

பழநியில் இருந்து பொள்ளாச்சி, கோவைக்கு இயக்கப்படும் பஸ்களில், உடுமலை பயணியரை ஏற்ற மறுக்கின்றனர். இதனால், குழந்தைகள், முதியவர்கள் சிரமப்படுகின்றனர். எனவே, பொள்ளாச்சி, உடுமலை வழியாக பழநிக்கு கூடுதல் பஸ்கள் இயக்க வேண்டும்.

மேலும், பிற கிராம வழித்தடங்களிலும், சிறப்பு பஸ்கள் இயக்கினால், பக்தர்களும் பயன்பெறுவர். போக்குவரத்து கழகத்துக்கும் கூடுதல் வருவாய் கிடைக்கும். விழாவுக்கு பின், சில நாட்கள் கூடுதல் பஸ் சேவையை நீட்டித்தால் பயனுள்ளதாக இருக்கும், என, பக்தர்கள் வலியுறுத்தியுள்ளனர்.