பி.ஏ.பி., மூன்றாம் மண்டல பாசனத்துக்கு இம்மாத இறுதியில், திருமூர்த்தி அணையிலிருந்து தண்ணீர் திறக்க திட்டமிடப்பட்டுள்ளது.

இதையடுத்து சாகுபடிக்கான பணிகளை விவசாயிகள் துவக்கியுள்ளனர். வரும் தைப்பட்டத்துக்கு தேவையான விதைகள் இருப்பு செய்யப்பட்டுள்ளதாக, வேளாண்துறையினர் தெரிவித்துள்ளனர்.

குடிமங்கலம் வட்டார வேளாண்துறை உதவி இயக்குனர் வசந்தா கூறியதாவது: குடிமங்கலம் வேளாண் விரிவாக்க கிடங்கில் சோளம், கோ-32, கம்பு கோ-11, உளுந்து வம்பன்-8, பாசிப்பயறு வம்பன்-5 மற்றும் தட்டைப்பயறு வம்பன்-3 விதைகள் மானிய விலையில் விவசாயிகளுக்கு வினியோகிக்க இருப்பு வைக்கப்பட்டுள்ளது.

சோளம் கோ 32 ரகமானது 108-110 வயதுடையது; தீவனத்துக்கும் தானியத்துக்கும் உகந்த பயிராகும். மானவாரியாகவும், இறவையாகவும் பயிரிடலாம்.

ஏக்கருக்கு, மானாவாரியாக, 840 கிலோ; இறவையாக, 1,164 கிலோ மகசூலும் தரக்கூடியதாகும்.

மேலும், இது தண்டு துளைப்பான் மற்றும் தண்டு ஈ தாக்குதலுக்கு, பூச்சி எதிர்ப்பு சக்தியும், கரும்பூசணம் மற்றும் அடிசாம்பல் நோய்த்தாக்குதலுக்கு நோய் எதிர்ப்பு சக்தி உடைய ரகமாகும்.

கம்பு கோ 10 ரகமானது, 85-90 வயதுடையதாகும். சாம்பல் நோய்க்கு எதிர்ப்பு சக்தி கொண்டதும், மானாவாரியாக, ஏக்கருக்கு, 1,170 கிலோ; இறவையாக 1,410 கிலோவும் தரக்கூடியதாகும்.

ஜன., ஏப் வரை, இறவையாகவும், ஜூலை, செப்., அக்., மாதத்தில், மானாவாரியாகவும் பயிரிட ஏற்ற ரகமாகும். எனவே, விதைகள் தேவைப்படும் விவசாயிகள், குடிமங்கலம் வட்டார வேளாண் விரிவாக்க மையத்தை அணுகலாம்.

இவ்வாறு, தெரிவித்தார்.