திருப்பூர் மாவட்டம் மடத்துக்குளம் தாலுகா காரத்தொழுவு அரசு மேல்நிலைப்பள்ளியில் ஆசிரியராக பணி புரிந்து வருபவர் உடுமலை யு.எஸ்.எஸ்., லே அவுட்டை சேர்ந்த சையது முகமது குலாம் தஸ்தகீர், 45.

நேற்று மாலை, 5:00 மணிக்கு பள்ளி காம்பவுண்டு சுவர் பகுதியில், 4 வாலிபர்கள் மது அருந்திக்கொண்டிருந்தனர். அவர்களை பார்த்த ஆசிரியர், இது பள்ளி வளாகம், பாட்டில்களை உள்ளே வீசுவதால் மாணவர்கள் பாதிக்கின்றனர்.

இங்கு மது அருந்த வேண்டாம் என எச்சரித்து அவர்களை அனுப்பியுள்ளார். பின்னர் மாலை, 6:00 மணிக்கு பள்ளி தலைமையாசிரியர் அறை அருகே, சையது முகமது குலாம் தஸ்தகீர், அமர்ந்திருந்தார்.

அப்போது, மது போதையில் வந்த 4 பேர், ஆசிரியரின் கை, கால்களை பிடித்து, கடுமையாக தாக்கியதோடு, தாங்கள் கொண்டு வந்திருந்த பெட்ரோலை அவர் மீது ஊற்றி, தீ வைக்க முயற்சித்தனர். ஆசிரியரின் அலறல் சத்தம் கேட்டு பொதுமக்கள் திரண்ட நிலையில், 4 பேரும் தப்பியோடினர்.

பலத்த காயங்களுடன் இருந்த ஆசிரியரை மீட்டு, உடுமலை அரசு மருத்துவமனையில் சிகிச்சைக்காக சேர்த்தனர்.

இந்த சம்பவம் காரத்தொழுவு பகுதியில் பரபரப்பை ஏற்படுத்தியுள்ளது. கணியூர் போலீசார் வழக்குப்பதிவு செய்து விசாரித்து வருகின்றனர்.