கண்ணீருடன் கோரிக்கை ஆய்வுக்கு வந்த அதிகாரியிடம் போராட்டக் குழு ஒருங்கிணைப்பாளர் ஈஸ்வரன் பேசுகையில், ''இதுவரை மாநகராட்சி குப்பை கொட்டிய இடங்களில் எல்லாம் நிலத்தடி நீர் கடுமையாக பாதிக்கப்பட்டுள்ளது. விவசாயம், கால்நடை வளர்ப்பு, பி.ஏ.பி., பாசனம், குடியிருப்புகள், அறிவியல் பூங்கா உள்ளிட்டவை சுற்றிலும் இருக்க, இங்கு குப்பை கொட்ட முயற்சி நடக்கிறது. நாங்கள் முழுக்க முழுக்க நிலத்தடி நீரை நம்பித்தான் விவசாயம் செய்து வருகிறோம். ஒருவேளை குப்பை கொட்டப்பட்டால், இப்பகுதி நிலத்தடி நீர் மாசடைந்து விடும். நாங்கள் மாநகராட்சியின் வளர்ச்சிக்கு எதிரானவர்கள் அல்ல. உண்மையான ஆய்வறிக்கையை கோர்ட்டுக்கு வழங்குவீர்கள் என நம்புகிறோம்,'' என்று கண்ணீர் மல்க, கைகளை கூப்பி கேட்டு கொண்டார்.

விவசாயிகள் மத்தியில் மாசுக்கட்டுப்பாடு வாரிய கோட்ட பொறியாளர் பாரதிராஜா பேசுகையில், ''ஐகோர்ட் உத்தரவின்படி, எனக்கு கொடுத்த பணியை செய்யவே வந்துள்ளேன். தற்போது, மாநகராட்சி இடம் என்ன நிலையில் உள்ளது, என்னென்ன பணிகள் நடந்துள்ளன என்பதைத்தான் ஆய்வு செய்து அறிக்கையாக வழங்க உள்ளேன். இதில் நான் மாற்றி வழங்குவதற்கு எதுவும் இல்லை. இது பொதுப்படையான ஆய்வறிக்கை. ஒளிவு மறைவு எதுவும் கிடையாது,'' என, கூறினார்.

இதனையடுத்து, பொதுமக்கள் மீண்டும் போராட்டத்தை தொடர்ந்தனர்.