உடுமலை தினசரி சந்தை உள்ளிட்ட சந்தைகளுக்கு முருங்கை, ஒட்டன்சத்திரம், தாராபுரம், மூலனுார் உள்ளிட்ட பகுதிகளில் இருந்து விற்பனைக்கு கொண்டு வரப்படுகிறது. கடந்த சில வாரங்களாக, தேவைக்கேற்ப முருங்கை வரத்து இல்லை.

அதிக வெயில் உள்ளிட்ட சீதோஷ்ண நிலை மாற்றங்களால், முருங்கை உற்பத்தி பாதிக்கப்பட்டுள்ளது. உடுமலை சுற்றுப்பகுதிகளிலும், முருங்கை சாகுபடி பரப்பு குறைவாகவே உள்ளது. தட்டுப்பாடு அதிகரிப்பால், முருங்கை விலை தொடர்ந்து அதிகரித்து வருகிறது. நேற்று உடுமலை உழவர் சந்தையில், முருங்கை விலை கிலோ, 80-95 ரூபாய் வரை விற்பனையானது.

பிற சந்தைகளில், கிலோ நுாறு ரூபாயை விலை தொட்டது. வரும் வாரங்களில் வரத்து குறைந்து, முகூர்த்த சீசனும் துவங்குவதால், முருங்கை விலை பல மடங்கு உயரும் என எதிர்பார்க்கப்படுகிறது.

அதேவேளையில் பிற காய்கறிகள் விலை குறைய துவங்கியுள்ளது. உழவர் சந்தையில் தக்காளி கிலோ 14-16, சின்னவெங்காயம் 30-35, சுரைக்காய், 10-15, புடலை 15-20 என்றளவில் விலை இருந்தது. பச்சை மிளகாய் வரத்து குறைந்துள்ளதால், கிலோ 45-50 ரூபாய் என்றளவுக்கு விற்பனையானது.

பெரியவெங்காயம் 25-30, வெண்டை 35-40, பீர்க்கன் 40-45, முள்ளங்கி 18-24, பீன்ஸ் 55 -60, பாகற்காய் 35-45, உருளைக்கிழங்கு 30 -35, தேங்காய் 40-60 என்ற அளவில் விற்பனையானது.