UPDATED : அக் 02, 2026 12:00 AM
ADDED : அக் 01, 2026 07:34 PM

திருப்பூர்: வரத்து சீராகியுள்ள நிலையில், விற்பனை சுறுசுறுப்பு இல்லாததால் திருப்பூரில் பூக்களின் விலை சரிவை சந்தித்துள்ளது.
புரட்டாசி மாத தொடக்கத்தில் மல்லிகை பூ 250 கிராம் ரூ.250-க்கும், கிலோ ரூ.900-க்கும் விற்பனையானது. தற்போது விற்பனை குறைந்துள்ளதால் 250 கிராம் ரூ.200-க்கும், கிலோ ரூ.700-க்கும் விற்பனை செய்யப்படுகிறது. வரத்து அதிகரித்துள்ளதால் முல்லை கிலோ ரூ.240, செவ்வந்தி ரூ.200, அரளி ரூ.220 என விலை குறைந்துள்ளது.
இதுகுறித்து பூ விவசாயிகள் கூறுகையில், ‘புரட்டாசி மாதத்தில் முகூர்த்த தினங்கள் இல்லாததால் விற்பனை மந்தமாக உள்ளது. அவ்வப்போது பெய்யும் மழையால் விவசாயிகள் அதிகளவில் பூக்களை பறித்து விற்பனைக்கு கொண்டு வருகின்றனர். பூக்களை அதிகளவில் இருப்பு வைக்க முடியாததால், உடனுக்குடன் விற்பனை செய்ய வேண்டியுள்ளது. இதனால் விலையும் குறைந்துள்ளது’ என்றனர்.
