திருப்பூர் மாவட்டம், திருமூர்த்திமலை சுற்றுலா மற்றும் ஆன்மீக மையமாக உள்ளது. மலைமேலுள்ள பஞ்சலிங்க அருவி மற்றும் மலையடிவாரத்தில், தோணியாற்றின் கரையில், சிவன், விஷ்ணு, பிரம்மா ஆகியோர் ஒருங்கே எழுந்தருளியுள்ள அமணலிங்கேஸ்வரர் கோவில் உள்ளது.

திருமூர்த்திமலைப்பகுதிகளில், இரு நாட்களாக பெய்து வரும் கன மழை காரணமாக, பஞ்சலிங்க அருவியில், பல அடி உயரத்திற்கு நீர் ஆர்ப்பரித்து கொட்டி வருவதோடு, அருவிக்கு செல்லும் நடை பாலம் வரை வெள்ள நீர் ஓடி வருகிறது.

அதே போல், மலையடிவாரத்திலுள்ள அமணலிங்கேஸ்வரர் கோவிலை, நேற்று முன்தினம், இரவு, 7:45 மணிக்கு, வெள்ளநீர் சூழ்ந்தது.

படிப்படியாக, வெள்ள நீர் ஆர்ப்பரித்து வந்ததோடு, கன்னிமார் கோவில், அமணலிங்கேஸ்வரர் கோவில், விநாயகர் கோவில் என பல அடி உயரத்திற்கு வெள்ள நீர் ஓடியது. பல ஆண்டுகளுக்கு பின், கோவில் வளாகம் காட்டாற்று வெள்ளத்தால் சூழ்ந்ததால், இரண்டாவது நாளாக நேற்றும் பக்தர்கள், சுற்றுலா பயணியர், அருவி மற்றும் கோவில் வளாகத்திற்குள் அனுமதிக்கப்படவில்லை. கோவில் அலுவலர்கள் மற்றும் ஊழியர்கள் பாதுகாப்பு பணியில் ஈடுபட்டனர்.