காங்கயம் வட்டாரம், பாலசமுத்திரம்புதுார், கத்தாங்கண்ணி மற்றும் கணபதிபாளையம் ஊராட்சிகளில் உள்ளற முனியப்பன் கோவில், தமலான்தோட்ட குட்டை, சிவகிரி முனியப்பன் கோவில், கோடாங்கி காடு, பார்வதிக்காடு மற்றும் வெள்ளியங்காடு தடுப்பணைகள், அய்யன்னாரப்பன் குட்டை, ஜல்லிமேடு புதிய தடுப்பணை, மனக்காட்டு குட்டை மற்றும் தடுப்பணை, வாரனாசிக்காட்டு குட்டை உள்ளிட்ட, 20 குளம், குட்டை மற்றும் தடுப்பணைகள் உள்ளன.

நீர்மட்டம் சரிவு

இருப்பினும், இக்கிராமங்களில் நிலத்தடி நீர்மட்டம் குறைந்து வருவதால், வறட்சி தலைதுாக்கி, விவசாயம் பாதிக்கப்பட்டு, வருகிறது. எனவே, நீண்ட கால மற்றும் நிலையான நீர் மேம்பாடு திட்டமாக, நொய்யல் ஆற்றில் உள்ள குளத்தில் இருந்து, நீர் செறிவூட்டல் அடிப்படையில், குளம், குட்டைகளுக்கு நீர் நிரப்பி, அதன் வாயிலாக நிலத்தடி நீர்மட்டத்தை உயர்த்த, 5.24 கோடி ரூபாய் செலவில் திட்டம் தயாரிக்கப்பட்டு, செயல்படுத்தப்பட்டு வருகிறது.

செயல்படும் விதம்

அதன்படி, நொய்யல் ஆற்றில் இடது கரையில் ஏற்கனவே இருக்கும் கிணற்றில் இருந்து மின் மோட்டார் மூலம் நீர் உந்தப்பட்டு, 20க்கும் மேற்பட்ட குளம், குட்டை, தடுப்பணைகளுக்கு செலுத்தி, அவற்றை நிரப்புவதே திட்டம். இவற்றை நிரப்புவதற்கு, 3.94 மில்லியன் கன அடி நீர் தேவைப்படுகிறது எனவும் கணக்கிடப்பட்டுள்ளது. இதற்காக, திருப்பூர் மாவட்ட கனிம அறக்கட்டளை நிதியின் கீழ், 5.24 கோடி ரூபாய் நிதி ஒதுக்கப்பட்டு, பணிகள் நடந்து வருகின்றன.

திட்டப்பணிகளை பார்வையிட்ட அமைச்சர் சாமிநாதன், ''இத்திட்டம் நடைமுறைக்கு வந்தால் இந்த கிராமங்களில் நிலத்தடி நீர்மட்டம் உயரும்; குளங்கள் மற்றும் தடுப்பணைகளை சுற்றியுள்ள வறண்ட நிலங்களில் விவசாயம் சார்ந்த பணிகளை மேற்கொள்ள முடியும். இதனால், விவசாய திறன் மேம்படும்'' என நம்பிக்கை ஏற்படுத்தினார்.

எப்படி சாத்தியம்?

திருப்பூரை மையப்படுத்தி ஓடும் நொய்யல் ஆற்றில் மழைநீரும், தொழிற்சாலைகளின் சாயக்கழிவுநீர், குடியிருப்பு மற்றும் வணிக நிறுவனங்களில் இருந்த வெளியேறும் சாயக்கழிவு நீரும் தான் ஓடுகிறது. நீர் மிகவும் மாசுபட்டிருப்பதால், கேன்சர் உள்ளிட்ட கொடிய நோய்கள் கூட உருவாகிறது என, மருத்துவ ஆய்வறிக்கை கூட தெரிவித்திருக்கிறது.இந்நிலையில் நீரில் கலந்துள்ள டி.டி.எஸ்., அளவு, 700 என்ற அளவில் இருக்கும் போது மட்டும் தான் அந்த நீர், குளம், குட்டைகளை நிரப்ப பம்ப் செய்யப்படும் எனவும் திட்டத்தில் குறிப்பிடப்பட்டுள்ளது.

இந்தளவு சுத்தமான நீர் நொய்யலில் செல்ல வேண்டுமானால், நொய்யல் நீர் பிடிப்பு பகுதிகளில் மழை கொட்டி தீர்க்க வேண்டும்; நொய்யலில் வெள்ளம் பெருக்கெடுத்து ஓட வேண்டும்; அவ்வாறு ஓடும் நீரில் ஆற்றில் கலந்துள்ள கழிவுகள் அடித்து செல்லப்பட்டு, பின் ஓரளவு சுத்தமான நீர் ஓடும் போது தான், 700 டி.டி.எஸ். என்ற நிலையை அந்த தண்ணீர் அடையும்.