பின்னலாடை உற்பத்தி நிறுவனங்கள், தங்கள் தொழிலாளர்களுக்கு பயிற்சி அளித்து, கிரிக்கெட் அணியை உருவாக்கிவைத்துள்ளன. அந்த அணியினர், போட்டிகளில் பங்கேற்று, விளையாடிவருகின்றனர்.கடந்த 2015முதல் இதுவரை, ஆறு கிரிக்கெட் போட்டிகள் நடத்தி முடிக்கப்பட்டுள்ளன.

'அப்துல் கலாம் சுழற்கோப்பை'க்கான ஏழாவது 'நிப்ட்-டீ பிரீமியர் லீக்' கிரிக்கெட் போட்டி, நிப்ட்-டீ கல்லுாரி மைதானத்தில், வரும் 9ம் தேதி துவங்குகிறது. நிப்ட்-டீ கல்லுாரியுடன், டெக்னோ ஸ்போர்ட் இணைந்து போட்டி நடத்தப்படுகிறது.

திருப்பூர் மற்றும் கோவை மாவட்டங்களை சேர்ந்த 20 பின்னலாடை உற்பத்தி நிறுவன கிரிக்கெட் அணிகள், மோதுகின்றன. முதலில், 15 ஓவர்களுடன் லீக் போட்டிகளும்; காலிறுதி முதல், 20 ஓவர்களுடன் 'நாக்-அவுட்' முறையிலும் போட்டிகள் நடைபெறும். லீக், காலிறுதி, அரையிறுவையை தொடர்ந்து, இறுதிப்போட்டிகள், வரும் நவம்பர் 9ம் தேதி நடைபெறும்.

கிரிக்கெட் தொடரில், முதலிடம் பிடிக்கும் அணிக்கு, 50 ஆயிரம் ரூபாய் ரொக்கம் மற்றும் அப்துல் கலாம் சுழற்கோப்பை; இரண்டாமிடம் பிடிக்கும் அணிக்கு, 25 ஆயிரம் ரூபாய் ரொக்கம் மற்றும் பரிசுக்கோப்பை; மூன்று மற்றும் நான்காமிடம் பிடிக்கும் அணிகளுக்கு பரிசுக்கோப்பைகள் வழங்கப்பட உள்ளது.