கடந்த மே 30ம் தேதியிட்ட அரசாணைப்படி, பல்லடம் புறவழிச்சாலை என்.எச்., 81 விரைவில் அமைய இருப்பதாக தெரியவருகிறது. ஆனால், 9.9 கி.மீ., நீளமுள்ள புறவழிச்சாலை திட்டத்தை கைவிடக்கோரியும், அதற்கு மாறாக 13.85 கி.மீ., நீளமுள்ள மற்றொரு புறவழிச்சாலை திட்டத்தை செயல்படுத்த கோரியும், மத்திய அமைச்சர் நிதின் கட்கரிக்கு ஒருதரப்பினர் மனு அனுப்பியுள்ளனர்.

ஏற்கனவே பரிசீலனையில் இருந்து பின் கைவிடப்பட்ட 13.85 கி.மீ., நீள புறவழிச்சாலை அமையும் வழித்தடத்தால், விவசாயிகள், குறு, சிறு தொழில்முனைவோராகிய நாங்கள் பாதிக்கப்படுவோம். ஊர் பொதுமக்கள் இணைந்து, அரசுக்கு தொடர் கோரிக்கை வைத்தும், கிராமசபைகளில் தீர்மானம் நிறைவேற்றியதையடுத்து, அந்த திட்டம் கைவிடப்பட்டது.

தற்போது அதே பழைய திட்டத்தை செயல்படுத்தக்கோரி சிலர், மத்திய அமைச்சரிடம் மனு அளித்துள்ளனர். திட்டம் நிறைவேற்றப்பட்டால், பி.ஏ.பி., பாசன குறு, சிறு விவசாய நிலங்கள், கிணறு, ஆழ்துளை கிணறுகள், அரசு பள்ளி, கோவில்கள், தென்னை மரங்கள், விசைத்தறி, கோழிப்பண்ணைகள் பாதிக்கப்படும்.

எனவே, 13.85 கி.மீ., நீளத்துக்கு புறவழிச்சாலை அமைக்கும் பழைய திட்டத்தை பரிசீலிக்க கூடாது; அந்த திட்டத்தை கைவிட வேண்டும்.