திருமணமான 2 வாரத்தில் வாலிபர் தற்கொலை திண்டுக்கல் மாவட்டம், பழநி, பாளையத்தை சேர்ந்தவர் கவுதம், 28; மேன் பவர் நிறுவனத்தில் தொழிலாளி. இவருக்கு, கணவரை இழந்த, ஏழு வயது குழந்தையுடன், மூலனுாரில் வசித்து வந்த பானுபிரியா, 29 என்பவருடன் பழக்கம் ஏற்பட்டது. இருவரும் காதலித்து வந்த நிலையில், பெற்றோர் சம்மதத்துடன் கடந்த 3ம் தேதி ஒட்டன்சத்திரத்தில் திருமணம் செய்தனர். கணவர் மது அருந்தி விட்டு வீட்டுக்கு வந்ததால் குடும்ப பிரச்னை ஏற்பட்டது.

கடந்த 12ம் தேதி மனைவியுடன் தகராறு செய்து, தாலியை கேட்டு வாங்கி கொண்டு, திருநீலகண்டபுரத்தில் உள்ள அறைக்கு கவுதம் சென்றார். கத்தியால் கழுத்தை அறுத்து கொள்வதாக மிரட்டினார். இதையறிந்து மனைவி அறிவுரை கூறினார். இதையடுத்து, மனைவியை பார்க்க வீட்டுக்கு சென்ற கவுதம், பெட்ரோலை ஊற்றி தீக்குளித்தார். காயமடைந்த கவுதமை மீட்டு தாராபுரம் அரசு மருத்துவமனைக்கு கொண்டு செல்லும் வழியில் இறந்தார். மூலனுார் போலீசார் விசாரிக்கின்றனர்.

டிராக்டர் மோதி ஒருவர் பலி தாராபுரம், காளிபாளையத்தை சேர்ந்தவர் ஜெயபால், 35. டூவீலரில் தசராபட்டி அருகே சென்றபோது, டிராக்டர், டூவீலர் மீது மோதியது. படுகாயமடைந்த வாலிபரை மீட்டு தாராபுரம் அரசு மருத்துவமனைக்கு அழைத்து சென்றனர். சிகிச்சை பெற்ற நிலையில், நள்ளிரவு பரிதாபமாக இறந்தார். தாராபுரம் போலீசார் விசாரிக்கின்றனர்.