நேற்று முன்தினம் நடந்த சம்பவத்தை தொடர்ந்து, இதன் அருகிலுள்ள, இடுவாய் ஊராட்சிக்கு சொந்தமான மற்றொரு இடத்தில், மாநகராட்சியினர் குப்பைகள் கொட்டுவதற்காக ஆய்வு மேற்கொள்ள வந்தனர். தகவல் அறிந்து வந்த பொதுமக்கள், அதிகாரிகள் வாகனத்தை சிறைபிடித்து சாலை மறியலில் ஈடுபட்டனர்.

மாநகராட்சி அதிகாரிகள் மற்றும் போலீசார், மறியலில் ஈடுபட்ட பொதுமக்களிடம் பேச்சு வார்த்தை நடத்தினர். அதில், ''இடத்தை ஆய்வு செய்வதற்காக மட்டுமே வந்துள்ளோம். உங்களின் கருத்துக்களை மாநகராட்சி கமிஷனரிடம் தெரிவிக்கிறோம்,'' என்றனர். இதனால், மாநகராட்சி அதிகாரிகள் அங்கிருந்து திரும்பி சென்றதும், பொதுமக்கள் மறியல் போராட்டத்தை கைவிட்டனர்.

அப்பகுதி பொதுமக்கள் கூறியதாவது: ஏற்கனவே, 30 ஆண்டுக்கு முன், இப்பகுதியில் குப்பை கொட்டப்பட்டிருந்த நிலையில், ஈக்கள், கொசு மற்றும் புழு பூச்சிகளால் மிகவும் அவதிப்பட்டு வந்தோம். கோர்ட் வழக்கு தொடரப்பட்டு, அதன் பின்னரே குப்பை கொட்டுவது நிறுத்தப்பட்டது. விவசாயம் மற்றும் கால்நடை வளர்ப்பு இப்பகுதியில் பிரதானமாக உள்ள நிலையில், குப்பைகளால் மிகவும் பாதிப்பு உள்ளது.

ஆடு , மாடுகள் நெகிழிப் பைகளை உண்டு சாவதா? ஒரு ஊராட்சியின் குப்பை கொட்டினாலே எந்த அளவு பாதிப்பு என்பது எங்களுக்கு தெரியும்.

அவ்வாறு இருக்க, ஒட்டு மொத்த மாநகராட்சியின் குப்பைகளையும் இங்கு வந்து கொட்டுவதை ஏற்க முடியாது. நாங்கள் உயிரோடு இருப்பதா? வேண்டாமா. இச்சிப்பட்டியை காலி செய்து விட்டு, தற்போது இங்கு வந்து விட்டீர்களா?

நெருப்பெரிச்சல் பகுதியில் குப்பை கொட்டிக்கொண்டு தான் இருந்தீர்கள். அதனை முறையாக செய்திருந்தால், அங்குள்ள மக்களே எதிர்த்திருக்க மாட்டார்கள். இங்கு குப்பை கொட்டினால் விவசாயமே செய்ய முடியாது. எனவே, எங்கள் எதிர்ப்பை மீறி இப்பகுதியில் குப்பை கொட்ட கூடாது. கொட்டவும் விட மாட்டோம்.

இவ்வாறு அவர்கள் கூறினர்.