திருமூர்த்தி அணையிலிருந்து மண்டல பாசனத்துக்கு, பிரதான மற்றும் கிளை கால்வாய்களில் தண்ணீர் திறக்கும் போது, நீர் திருட்டு பெரிய பிரச்னையாக மாறியுள்ளது. இந்தாண்டு நீர் திருட்டை தடுக்க திருப்பூர் மாவட்ட நிர்வாகமும், நீர் வளத்துறையினரும் ஆலோசித்து நடவடிக்கைகளை துவக்கியுள்ளனர்.

பி.ஏ.பி., திருமூர்த்தி கோட்ட செயற்பொறியாளர் பிரபாகரன் கூறியதாவது: பி.ஏ.பி., ஆயக்கட்டு பாசன நிலங்களுக்கு, தண்ணீர் செல்லும் காலங்களில், பிரதான, கிளை, பகிர்மான கால்வாய்களில், நீர் திருட்டில் ஈடுபடக்கூடாது.

கால்வாய்களின் இரு புறமும், 300 மீட்டருக்குள் அமைந்துள்ள கிணறுகளிலிருந்து, பாசன காலங்களில் நீர் எடுக்க தடைவிதிக்கப்படும்.

அதோடு, பக்கவாட்டு துளைகள் அமைத்திருத்தல், கால்வாயின் குறுக்கே குழாய் அமைத்து முறைகேடாக தண்ணீர் கொண்டு செல்வது போன்ற செயல்களில் ஈடுபட்டால், போலீசில் கிரிமினல் வழக்குப்பதிவு செய்து, மின் இணைப்பு துண்டிப்பு, அரசு சலுகைகளை ரத்து செய்தல் போன்ற கடுமையான நடவடிக்கைகள் எடுக்கப்படும்.

நீர்வளத்துறையால் விவசாய பயன்பாட்டிற்கு புதிய மின் இணைப்பு வழங்க, மின் வாரியத்திற்கு வழங்கப்படும் தடையின்மை சான்றுகளிலும், பாசன கால்வாய்களில் தண்ணீர் செல்லும் காலங்களில், மின் மோட்டார்களை இயக்கக்கூடாது எனத் தெளிவாக குறிப்பிட்டு, சான்று வழங்கப்பட்டுள்ளது.

எனவே, பி.ஏ.பி., இரண்டாம் மண்டல பாசனத்திற்கு, விரைவில் தண்ணீர் திறக்க உள்ள நிலையில், கால்வாய்களில் விதிமுறைகளை மீறி, மின்மோட்டார்களை இயக்கினால், மின் இணைப்பை உடனடியாக துண்டிக்க மின் வாரியத்திற்கு பரிந்துரைக்கப்படும்.

மின் மோட்டார்கள், குழாய்கள் பறிமுதல் மற்றும் குற்றவழக்கு பதிவு செய்து கைது உள்ளிட்ட நடவடிக்கை எடுக்கப்படும்.

இவ்வாறு, தெரிவித்தார்.