திருப்பூர், முத்தணம்பாளையம், வாய்க்கால் மேட்டை சேர்ந்தவர் பாஸ்கர பாண்டியன், 49; ஹிந்து முன்னணி மாவட்ட செயலாளர்.

கடந்த, 16ம் தேதி வீட்டுக்கு வாய்க்கால் மேடு வழியாக டூவீலரில் சென்று கொண்டிருந்தார்.

அப்போது, டூவீலரில் வந்த, இருவர், பாண்டியனை வழிமறித்து, கட்டையால் தாக்கினர். முகத்தில் மிளகாய் பொடி துாவி, கழுத்தில் அணிந்திருந்த, 6.5 சவரன் நகையை பறித்து சென்றனர். புகாரின் பேரில் நல்லுார் போலீசார் விசாரித்தனர்.

நிர்வாகியை தாக்கி நகை பறிப்பு தொடர்பாக, ஹிந்து முன்னணி தொண்டர்கள் ஸ்டேஷனை முற்றுகையிட்டு, குற்ற செயல்களில் இரும்பு கரம் கொண்டு ஒடுக்க வேண்டும் என கோரிக்கை விடுத்தனர்.

இச்சூழலில், இரு நாட்களாக தனிப்படை போலீசார் பல்வேறு கட்ட விசாரணை நடத்தினர். அதில், பலவஞ்சிபாளையத்தை சேர்ந்த சூர்யா, 24 என்பவரை கைது செய்து, பறித்த, 6.5 சவரன் நகையை பறி முதல் செய்து, மற்றொரு நபரை போலீசார் தேடி வருகின்றனர்.