திருப்பூர் மாவட்டம், உடுமலை அருகேயுள்ள திருமூர்த்திமலைப்பகுதிகளில், நேற்று முன்தினம் இரவு முதல் கனமழை பெய்து வருகிறது. இதனால், மலைமேலுள்ள பஞ்சலிங்கம் அருவியில் வெள்ளநீர் ஆர்ப்பரித்து கொட்டி வருகிறது.

அதே போல், மலையடிவாரத்தில், தோணியாற்றின் கரையில், சிவன், விஷ்ணு, பிரம்மா ஆகியோர் ஒருங்கே எழுந்தருளி வரும், அமணலிங்கேஸ்வரர் கோயில் உள்ளது.

கனமழையால், தோணியாற்றில் வெள்ளப்பெருக்கு ஏற்பட்டு, அமணலிங்கேஸ்வரர் கோயில், கன்னிமார் கோயில், விநாயகர், முருகன் கோயில்கள் வரை வெள்ள நீர் ஓடி வருகிறது.

இதனால், பாதுகாப்பு கருதி, நேற்று காலை முதல், பக்தர்கள், சுற்றுலா பயணியர் கோயில் வளாகத்திற்குள் வராதபடி, தடுப்பு அமைத்து, கோயில் ஊழியர்கள் கண்காணிப்பு பணியில் ஈடுபட்டு வருகின்றனர்.

தொடர்ந்து, திருமூர்த்திமலை பகுதிகளில் மழை பெய்து வந்த நிலையிலும், கோயில் மற்றும் பஞ்சலிங்கம் அருவிக்கு செல்ல தடை விதிக்கப்பட்டதால், பக்தர்கள், சுற்றுலா பயணியர் ஏமாற்றத்துடன் திரும்பினர்.