சிந்து, ஜெர்ஸி இன கலப்பின கறவை மாடுகள், பிற இன மாடுகளை விட, சற்று அதிக அளவு பால் கொடுப்பதால், இந்த ரக மாடுகளை விவசாயிகள் அதிக ஆர்வத்துடன் வளர்த்து வருகின்றனர். கடந்த மாதம், இப்பகுதியில் வாய்சப்பை நோய் என அழைக்கப்படும் கோமாரி நோய் பரவியது. இந்நோய்க்கு ஆளான 100க்கும் மேற்பட்ட கறவை மாடுகள், மூன்று நாட்கள் வரை தீவனம் எடுக்க முடியாமல், தண்ணீர் அருந்த முடியாமல் வாயில் நுரை தள்ளியபடி இருந்தன. கரடிவாவி கால்நடை கிளை மருத்துவமனை ஊழியர்கள் மற்றும் கால்நடை பராமரிப்புத்துறையினர் வீடு, வீடாகச் சென்று வாய்சப்பை நோய் தாக்குதலுக்கு உள்ளான கறவை மாடுகளை கண்டறிந்து, இலவசமாக சிகிச்சை அளித்தனர். இதன் காரணமாக, நோய் தாக்குதலுக்கு உள்ளான கறவை மாடுகள் உயிர் தப்பின; விவசாயிகள் நிம்மதி அடைந்துள்ளனர்.