UPDATED : அக் 18, 2026 04:37 AM
ADDED : அக் 17, 2026 09:54 PM

ஆ யுதபூஜைக்காக கடைகள், தொழிற்சாலைகள், அலுவலகங்கள் என எங்கும் துாய்மைப் பணிகள் களைகட்டத் தயாராகி வருகின்றன. இயந்திரங்களுக்கும் கருவிகளுக்கும் மாலை சூட்டி, வண்ணத் தோரணங்களால் வாசலை அலங்கரிக்கும் அந்தப் பண்டிகை உற்சாகம், திருப்பூர் கடை வீதிகளிலும் தென்படுகிறது.
வீடுகள் முதல் தொழிற்சாலைகள் வரை சுத்தம் செய்து, பூஜைக்குத் தயார்படுத்தும் பணிகள் துவங்கிவிட்டன.
ஆயுதபூஜை அலங்காரங்களுக்காக, திருப்பூர் காமாட்சியம்மன் கோவில் வீதி, பெருமாள் கோவில் வீதி, அரிசிக்கடை வீதி, தினசரி மார்க்கெட் வீதி உள்ளிட்ட பகுதிகளில் வண்ணக் காகிதத் தோரணங்கள் விற்பனைக்கு வந்துள்ளன. மாவிலைத் தோரணங்கள், மலர் மாலைகள், மின்னொளி மிளிரும் அலங்காரங்கள் என கடைகளில் வண்ணங்களின் அணிவகுப்பு கண்களைக் கவர்கிறது.
ரூ.15 முதல் ரூ.1,500 வரை பல்வேறு வகையான தோரணங்கள் விற்பனைக்கு வைக்கப்பட்டுள்ளன. பூஜைக்கான பொருட்களை வாங்க மக்கள் இன்று இரவு முதல் கடைகளுக்கு வருவார்கள் என்ற எதிர்பார்ப்பில் வியாபாரிகள் காத்திருக்கின்றனர். பண்டிகை நெருங்க நெருங்க, கடை வீதிகளும் அலங்காரங்களால் மேலும் களைகட்டும் என எதிர்பார்க்கப்படுகிறது.
